“Андижон”нинг Тошкентдаги йиғини якунланди
Ads

Янги мавсумга пухта ҳозирлик кўраётган "Андижон"нинг Тошкентда ўтказган ўқув-йиғин машғулотлари ўз якунига етди. Бу ҳақда клуб матбуот хизмати хабар бермоқда.

Таъкидлаш керакки, “бургутлар” пойтахтда ўқув-машғулотлар билан бирга бир қатор назорат учрашувларида ҳам майдонга тушди. Элдор Сакаев бошқарувидаги “Андижон”нинг навбатдаги босқич йиғини энди клуб қароргоҳида кечади. Режага кўра, жамоа аъзолари 18 февраль куни тушликдан сўнг Андижонда йиғилади ва машғулотлар Бўстон даҳасидаги, “Андижон” футбол клуби қошидаги “Вилоят болалар ва ўсмирлар футбол мактаби”нинг майдонида ўтказилади.

Таркибдаги сўнгги ўзгаришларга тўхталадиган бўлсак, кеча “Қизилқум”га қарши ўтказилган синов-назорат баҳсидан сўнг, мураббийлар Ҳусан Олимжонов билан хайрлашишга қарор қилди. “Машъал” жамоасидан таклиф этилган иқтидорли посбон эндиликда ўзига янги жамоа топиши мумкин. Шунингдек ҳимоячи Аваз Агалиев ҳам Фарғонанинг “Нефтчи” клубидан тушган таклифни қабул қилган кўринади.
“Андижон” таркибига ҳужумчи Даврон Исоқов келиб қўшилганини маълум қиламиз. Ўтган мавсум Қувасойнинг “Цементчи” жамоаси таркибида тўпурарлик маҳоратини кўрсатган Исоқов катта эхтимол билан жорий йил “Андижон” шарафини ҳимоя қилади.