Aндрей Микляев: Aйтганингиз келсин

“Сўғдиёна”га қарши учрашувдан кейин “Локомотив” бош мураббийи Aндрей Микляев ўз фикрларини билдириб ўтди. Бу ҳақда клуб матбуот хизмати хабар берди.

– “Сўғдиёна”ни ғалаба билан табриклайман. Бугун жанговар ўйин бўлди, бироқ афсуски, очко ишлаб ололмадик. Мағлубиятга лойиқ эмасдик, деб ҳисоблайман. Бугун бизнинг кунимиз эмас экан. Омад очиқчасига биздан юз ўгирди. Биринчи бўлимда икки стандартдан гол қўйиб юбордик. 2:0 ҳисоби меҳмон жамоа учун жуда катта зарба. Сафарда 0:2ни йўққа чиқариш жуда қийин.

Aҳамият берган бўлсангиз, иккинчи бўлимда сезиларли даражада қўшиб бордик. Кўплаб вазиятларга эга бўлдик, фойдаланганимизда мағлубият эмас, дуранг, балки ғалаба билан уйга қайтишимиз ҳам мумкин эди. Йигитларни ёндира олдик, улар гол уриш учун қаттиқ ҳаракат қилишди. Футболда вазиятлардан фойдалана олмаслик ҳолатлари кўп бўлади, бу шундай ўйин. Чиройли ўйин кўрсатиб, ғалабага эриша олмаганимиз ачинарли.

– Биринчи таймда ҳам иккинчи бўлимдаги каби ўйин кўрсатишнинг иложи бўлмадими?

– Ҳа, иложи бор эди. Бироқ футбол шундай ўйин, тушуняпсизми, голлар турли хил кўринишга эга. Биринчи голда жарима майдончаси ичида кўплаб футболчилар тўпланиб туришганди. Дарвозабон эса тўпни кўрмай қолди. Жарима зарбаси ажойиб тарзда амалга оширилди. Aйтганимдек, 0:2 ҳисобидан чиқиб кетиш жуда қийин. “Сўғдиёна” ҳимояга тизилиб олди ва яхши ҳимояланди, қарши ҳужумда ўйнашга ҳаракат қилди. Шу боисдан уларнинг мудофаа чизиғини ёриб ўтиш қийин кечди. Йигитлар бунга интилишди, вазиятларга эга бўлишди. Лекин фойдалана олишмади. Шу ўринда рақиблар посбонини эътироф этиб ўтиш ўринли. Жуда кўп вазиятларда жамоани қутқарди.

– Иккинчи даврадаги ўйинларни инобатга олган ҳолда бугунги ўйин натижасини омадсизлик дея оласизми?

– Биринчидан, айни дамда жамоани тиклаш даври кетмоқда. Таркибда ёш футболчилар кўп. Биз ёшлар орқали жамоа ўйинини тезлаштиришга ҳаракат қиляпмиз.

– “Локо” иккинчи даврани ажойиб бошлади. Мавсум якунига қадар жамоани турнир жадвалида юқори ўринларда кўришимиз мумкинми?

– Aйтганингиз келсин. Биз ҳаракат қиляпмиз, жамоа ҳар бир ўйинга ғалаба қозониш кайфияти билан тушмоқда. Бу йилда барчаси қийин ўтяпти, пандемия, жароҳатлар… Жамоаларнинг тайёргарлик жараёни ҳар хил ўтмоқда. Мавсумни иложи борича юқори ўринларда тугатишга ҳаракат қиламиз.