"Анфа" стадионида крикет бўйича Ўзбекистон очиқ чемпионати ўтказилди

Хабарингиз бор, жорий йилнинг 18-25 июнь кунлари Қибрай туманидаги "ANFA" халқаро крикет стадионида крикет федерацияси томонидан T20 форматдаги биринчи мавсум Ўзбекистон очиқ чемпионати бўлиб ўтди.

Ўзбекистон крикет федерациясининг йиллик-тақвим режасидан ўрин олган мазкур очиқ чемпионатда Тошкентнинг "АNFA", "Indian cricket Tashkent Club", "Tashkent super kings", "Tashkent super stars", Қашқадарё вилоятининг "Barlos"ҳамда Фарғонанинг "Fergana Rangers"дан иборат олтита жамоаси ўзаро беллашишди.

18 июнь куни старт олган чемпионат 25 июнь куни якунига етди. Рақиб жамоаларини ортда қолдирган Тошкентнинг "Tashkent super stars" ҳамда Фарғонанинг "Fergana Rangers" жамоалари финалгача етиб келди. Ҳал қилувчи финал босқичида эса иккита бўлим натижасига кўра, 187:128 ҳисоби билан "Tashkent super stars"ни мағлубиятга учратган водийнинг "Fergana Rangers" жамоаси биринчи ўринни қўлга киритди.

Чемпионатининг тақдирлаш маросимида Ўзбекистон крикет федерацияси бош котиби Фазлиддин Ибодуллаев иштирок этиб, мусобақа бош ҳомийси "HAFNA" бренди томонидан биринчи ўрин учун ажратилган 25 000 000 сўм пул мукофоти ва кубокни "Fergana Rangers" жамоасига тантанали тарзда топширди.
Шу тариқа крикет бўйича Т20 форматдаги Ўзбекистон очиқ чемпионатининг биринчи мавсум беллашувлари якунланди.
Таъкидлаш жоиз, ушбу очиқ чемпионат миллий терма жамоага саралаш вазифасини ҳам ўтаб берди.
                                                                                                                                    Илҳом РАҲМОНОВ тайёрлади