Англия академияларида таҳсил олган Нодирбек Бобомуродов "Сурхон" билан нималарни режалаштирмоқда? (интервью)

Англияда катта бўлган ва мамлакатнинг турли дивизионларда тўп сурган ватандошимиз Нодирбек Бобомуродов "Сурхон" билан шартнома имзолаганидан хабарингиз бор. SPORTS.uz инглиз футбол мактабида таҳсил олган футболчи билан эксклюзив интервьюни эътиборингизга тақдим этади.

Сиз билан анчадан бери танишмиз. Кўпчилик Англияда катта бўлиб, Буюк Британия футбол академияларини тамомлаганингиздан бехабар. Айтингчи, у ерда футбол билан профессионал шуғулланганмисиз?

- “Сурхон”га қадар “Коринтиан Касуалс” жамоасида фаолият олиб бордим. У инглиз футбол лигаларининг 3-босқичида ҳаракат қилади. Футбол билан профессионал шуғулланганман, аммо кейинроқ ярим профессионал клуб шарафини ҳимоя қилдим.

Сиз билан аввалроқ Ўзбекистоннинг турли ёш тоифасидаги мураббийлар алоқага чиққанми?

- Тўғриси, йўқ. Ҳеч қачон мен билан қизиқишмаган. Балки бунга ҳожат бўлмагандир. Билмадим, аммо миллий терма сафида тўп суришни орзу қиламан. Насиб қилса, меҳнат қилиб бу даражага эришишни режалаштирганман. Бир кун албатта терма сафида дебют қиламан деган умиддаман.

Ўзбек футболини авваллари ҳам кузатармидингиз?

- Албатта! Сўнгги икки йил давомида чемпионат ўйинларини, турнир жадвалини кузатдим. Ўтган мавсумдаги интрига мени ҳайрон қолдирди. Ўзбекистонда футболни жуда яхши кўришади. Ишқибозлар имкон қадар стадионларга ташриф буюришга уринади. Бу ёқимли ҳолат.

Нега айнан “Сурхон” вариантини танладингиз? Ўзбекистонга қайтишга нима ундади?

- Биринчи навбатда, бу ер мени ватаним, уни жуда яхши кўраман. Менга таклиф билан чиқишди. Бу мен учун жуда яхши имконият. Ўзимни танитиш ва ўзбек футбол ишқибозларига бор эканлигимни кўрсатиб қўйишни истадим. Жамоамиз асосан ёшлардан ташкил топган. Мен каби катта футболда кўр нарсани исботламоқчи бўлган йигитлар йиғилган бу ерга.

Маҳаллий футболчиларимиздан кимларни биласиз? Ўзбекистонлик футболчилардан қайси бири билан дўстсиз ёки яқин муносабатдасиз?

- Тўғриси, бунга қадар улар орасида дўслтарим йўқ эди. Ҳозир анча-мунчаси билан танишиб олишга улгурдим. Менимча, қисқа фурсат ичида барча билан танишиб оламан.

Аввало, Ўзбекистондаги ишларингизда омад тилайман. Айтингчи, режаларингиз қандай? Ўзбекистон Суперлигасидан нималарни кутяпсиз?

- Жуда ҳам ёрқин мавсум кутмоқдаман. Чиройли ўйин намойиш этиб, жамоамнинг ғалабаларига ҳисса қўшишни истайман. Суперлиганинг ўтган йилги интригасини инобатга олсак, буниси ундан қолишмаслиги аниқ. Насиб қилса, гол ва ассистларим билан ишқибозларни хурсанд қиламан.

Я . У