Англия чемпиони бўлган жамоа сотувга қўйилди

«Лестер Сити»нинг ҳозирги эгалари клубни сотиш режасига расман йўл очиб берди. Потенциал харидорлар учун таклиф киритишнинг сўнгги муддати 16 октябрь этиб белгиланди.

«Тулкилар»нинг таиландлик соҳиблари – King Power компанияси – шу тариқа клуб билан 16 йил давом этган ҳамкорликка нуқта қўйишни режалаштирмоқда.

Жиддий даъвогарлар номи ҳозирча ошкор этилмаяпти. Маълумотларга кўра, таклифлар қабул қилиш муддати кўпроқ эҳтимолий харидорлар жараёнга қўшилиши учун кейинроқ саналарга сурилган.

King Power «Лестер» учун 225 миллион фунт стерлинггача (тахминан 265 миллион евро) тушум олишни кутмоқда. Клуб ҳозирда Лига 1 мусобақасида иштирок этмоқда ва 8 турдан сўнг турнир жадвалида 17-ўринни эгаллаб турибди.

Агар битим шу атрофдаги суммада амалга ошса, у Англия футболида аҳамияти бўйича учинчи дивизионда ўйнаётган клуб учун энг йирик сотувлардан бири сифатида тарихга кириши мумкин.

Таиландлик компания «Лестер»ни 2010 йили Милан Мандаричдан 35 миллион фунт эвазига сотиб олган эди.

Орaдан олти йил ўтиб, «тулкилар» кутилмаганда Англия чемпионига айланди, 2017 йили Чемпионлар Лигаси чорак финалигача етди. 2021 йилда эса клуб ўз тарихида илк бор Англия Кубогини қўлга киритди.