Англия грандлари Португалиядан ҳимоячи олиб келади

Англиянинг етакчи клублари — «Манчестер Юнайтед» ва «Челси» Лиссабоннинг «Бенфика» марказий ҳимоячиси Томаш Араужунинг ўйинини диққат билан кузатишда давом этмоқда, деб хабар бермоқда TEAMtalk.

Манба маълумотига кўра, ҳар икки клуб скаутлари сентябрь ойида ўтказилган Чемпионлар Лигаси доирасидаги «Бенфика» – «Милан» учрашувини стадиондан кузатган. Ушбу беллашувда Араужу учрашувнинг энг яхши футболчиси деб топилгани англиялик клублар қизиқишини янада оширган. Англия чемпионатида фаолият юритувчи скаутлардан бири португалиялик ҳимоячининг «катта салоҳиятга эгалигини» таъкидлаган.

Араужуга бўлган қизиқиш фақат «Манчестер Юнайтед» ва «Челси» билан чекланиб қолмаяпти. Унга нисбатан «Тоттенхэм», «Ньюкасл» ва «Брайтон» клублари ҳам кузатув олиб бормоқда. Мутаҳассислар Араужунинг асосий афзалликлари сифатида ҳужумларни тўғри бошлаб бериш маҳорати, узатмаларининг кенг диапазони, шунингдек, ҳимоя марказида ҳам, ўнг қанотда ҳам ишончли ўйнай олишини қайд этмоқда.

Шу билан бирга, 24 ёшли футболчининг қишки трансфер ойнасиданоқ жамоасини ўзгартириши эҳтимоли паст баҳоланмоқда. Яқинда у «Бенфика» билан шартномасини 2031 йилгача узайтирди. Унга қўйилган тўлов миқдори 80 миллион евро этиб белгиланган. Клуб қишда бу суммадан кам таклифларни кўриб чиқиш ниятида эмас. Шу боис Араужунинг эҳтимолий трансфери камида келаси ёзгача кутилади, деган фикр устун.