Англия суперклуби яна "Милан" рекордчисини олмоқчи

Лондоннинг «Челси» клуби яна бир бор 18 ёшли «Милан» форварди Франческо Камардага қизиқиш билдирмоқда.

TEAMtalk маълумотича, инглиз клубининг BlueCo консорциумига мансуб эгалари ёш ҳужумчининг келажагини яқиндан кузатиб бормоқда. Қизиқишнинг қайта кучайишига Камарданинг ўйин амалиёти етарли эмаслиги сабаб бўлган: жорий мавсумда у А Серияда майдонда бор-йўғи саккиз дақиқа ўйнаган, холос.

Камарда Италия чемпионатида 15 ёш ва 260 кунлик пайтида дебют қилган ва мусобақа тарихидаги энг ёш футболчи сифатида қайд этилган. Кейинчалик у яна бир тарихий натижага эришиб, Чемпионлар Лигасида майдонга тушган энг ёш италиялик футболчига айланди.

Ўтган мавсумда ёш форвард «Лечче» жамоаси сафида ижара асосида тўп сурди, шундан сўнг «Милан» уни яна ўз таркибига қайтариб олди. Милан клуби ҳали ҳам Камарданинг салоҳиятига ишонмоқда ва ҳозирча уни сотиш режаси йўқ.

Камарда атрофидаги вазиятни фақат «Челси» эмас, балки «Манчестер Сити», «Тоттенхэм», «Брентфорд» ва «Брайтон» ҳам диққат билан кузатиб бормоқда.