Англияда Сатпаевни “Манчестер Сити” афсонасига қиёслашди

Буюк Британиянинг етакчи медиа компанияси BBC Лондоннинг «Челси» клуби сафида илк бор майдонга тушган қозоғистонлик ёш ҳужумчи Дастан Сатпаев ҳақида махсус материал эълон қилди.

Сатпаев Англия клуби учун дебютини Австралия сафари доирасида ўтказилган ўртоқлик учрашувида амалга оширди. «Челси» «Вестерн Сидней Уондерерс» жамоасига қарши голларга бой беллашувда 6:4 ҳисобида ғалаба қозонди ва ушбу ўйинда Дастаннинг ҳаракатлари инглиз ОАВ эътиборини тортди.

Клубга яқин журналист Низзар Кинселла тайёрлаган мақолада таъкидланишича, 17 ёшли форвард Англия премьер-лигасида майдонга тушган илк қозоғистонлик футболчига айланишни мақсад қилган.

«Ўз юртида у аллақачон супер юлдуз сифатида қабул қилинади. Миллий терма жамоа сафида ўйнашга улгурган. Унинг ортидан юзлаб мухлислар Австралияга ҳам етиб келди: якшанба куни очиқ машғулотга, сешанба куни эса Сиднейдаги ўйинга юртдошлари ташриф буюришди. Тезкор, жарима майдонида чаққон ва бўйи жуда баланд бўлмаган Сатпаев услуби жиҳатдан кўпинча „Манчестер Сити“нинг собиқ ҳужумчиси Серхио Агуэро билан солиштирилади», — дея ёзади муаллиф.

«Челси»нинг навбатдаги ўртоқлик учрашуви 1 август куни «Тоттенхэм»га қарши ўтказилиши режалаштирилган.