Англиянинг ўртоқлик ўйинида Мадуэке жароҳат олди

Англия терма жамоаси аъзоси Нони Мадуэке Уэмблида Уругвайга қарши ўтган ўртоқлик учрашувида 37-дақиқада майдонни тарк этди.

"Арсенал" вингери Родриго Агирре билан тўқнашувдан сўнг дастлаб ўйинни давом эттиришга ҳаракат қилди. Бироқ орадан уч дақиқа ўтиб яна ерга ўтириб қолди ва унинг ўрнига Жаррод Боуэн майдонга туширилди.

Эслатиб ўтиш жоиз, бу ҳафта бошидаёқ бир қатор футболчилар — Габриэл (Бразилия), Вильям Салиба (Франция), Эберечи Эзе (Англия) ва Леандро Троссард (Бельгия) турли сабабларга кўра, терма жамоалари йиғинларини тарк этган эди.

Уэмблидан хабар берган журналист Питер Смитнинг таъкидлашича, бу ҳолат Мадуэке учун Жаҳон чемпионати олдидан ўзини кўрсатиш имкониятига жиддий зарба бўлди. Шунингдек, бу "Арсенал" учун ҳам нохуш хабар бўлиши мумкин.

Маълум қилинишича, футболчи майдонни тарк этаётганда бош мураббий Томас Тухель билан қисқа мулоқот қилди ва чап тиззасини кўрсатди. Бироқ унинг аниқ қандай жароҳат олгани ҳозирча номаълум.

Бу ҳафтада "Арсенал"нинг бир нечта футболчилари жароҳат сабабли терма жамоалардан қайтгани ҳисобга олинса, жамоа бош мураббийи Микель Артета Мадуэкенинг ҳолати бўйича ижобий янгилик кутаётгани аниқ.

Лондонликлар навбатдаги учрашувини 4 апрель куни Англия Кубогида "Саутгемптон"га қарши ўтказади. Шундан сўнг 7 апрель куни Чемпионлар лигаси чорак финали биринчи ўйинида "Спортинг"га қарши майдонга тушади.