Анри: "Исак АПЛдаги энг яхши ҳужумчилардан бири, аммо унинг кетиш истаги клубни қийин аҳволга солмоқда"

Тьерри Анри Александер Исакнинг "Ньюкасл"дан кетиш истагига тўхталиб ўтди.

"Унинг ўтган мавсумдаги ўйинларига қараганда, у Холанд билан рақобатлаша олади. Менимча, у ҳозирда лигадаги энг яхши ҳужумчилардан бири, балки энг яхшиси ҳам. Шунинг учун "Ньюкасл"да ғам-андӯҳ бор — улар лиганинг деярли энг кучли форвардини йўқотиш арафасида.

Исак тўп билан ҳам, ундан ташқарида ҳам жуда кўп нарса беради, ҳужумларни якунлашда ҳам маҳоратли. Агар футболчи жуда яхши бўлмаса ва клуб унинг кетишини истаса, ҳеч ким афсусланмайди. Аммо Исакнинг ҳолати бошқача, шу боис мухлисларни ҳам, клубни ҳам тушуниш мумкин.

Футболчи машғулотга чиқмаганини одамлар тушунмаслиги табиий. Балки "Ньюкасл" унга бир гап айтгандир, у бошқача жавоб бергандир — аслида нималар бўлганини ҳеч қачон тўлиқ билмаймиз. Аммо бир нарсани айта оламан: машғулотдан бош тортиш тўғри йўл эмас.

Менимча, идеал ҳолатда у кетиши ҳамма учун маъқул бўларди. Лекин агар бу хатолик деб ҳисобланса ва Исак кечирим сўраб, ўтган мавсумдагидек гол уришда давом этса, "Ньюкасл" мухлислари яна ундан мамнун бўлишади", — деди "Арсенал"нинг собиқ форварди.