АПЛ клуби қуйи лигадан икки нафар зўр мураббий топди

Англия Премьер-лигасида ўртамиёна жамоалардан ҳисобланган “Кристал Пэлас” ёзда янги мураббий тайинлаши керак бўлади.

Жамоани бошқариб келаётган Оливер Гласнер мавсум якунланиши билан бош мураббийлик лавозимини тарк этишга қарор қилган.

Сўнгги маълумотларга қараганда, “Кристал Пэлас” бу мавсум қуйи лигада ишлаётган икки мутахассисни бош мураббийликка номзодлар рўйхатига киритди.

Фрэнк Лэмпард “Ковентри Сити”ни 25 йиллик танаффусдан сўнг, илк бор “Англия Премьер-лигасига олиб чиқди. Бу муваффақиятдан кейин Лэмпардни мамлакатнинг кучли клублари ҳам нишонда ушлаб турибди. Хусусан, “Челси” раҳбарияти ҳам ўзининг афсонавий футболчини бош мураббийликка чорлаяпти.

Шунингдек, Чемпионшипда “Ипсвич Таун” жамоасини бошқараётган Киран Маккенна ҳам “Кристал Пэлас”дан чорлов олиши кутиляпти. Маккеннанинг жамоаси ҳам жорий чемпионат якунига кўра, олий дивизионга чиқиш имкониятини сақлаб турибди.

Ҳар икки мураббийнинг клублари билан амалдаги шартномалари бор. Хусусан, уларни ишга таклиф қиладиган клублар Лэмпард учун 5 миллион фунт, Маккенна учун эса 8 миллион фунт товон пули тўланиши мумкин.