Ўзбек футболчиси Швейцарияда гол уриб, тарихга кирди, рақиб янчиб ташланди

Швейцария Суперлигасининг кечиктирилган тўртинчи тур учрашувиЎзбекистон миллий терма жамоаси ҳимоячиси Беҳруз Каримов учун тарихий аҳамият касб этди.

19 ёшли футболчимиз ўйнаётган  “Лугано” клуби ўз майдонида ўтган ушбу баҳсда мамлакатнинг кучли жамоаларидан ҳисобланган “Санкт-Галлен” жамоасини янчиб ташлади.

Жорий мавсумда Швейцария чемпионати юқори дивизионида пешқадамлик қилаётган “Лугано” дастлабки дақиқалардан ҳужумга зўр берди. Дастлабки ярим соат ичида мезбонлардан Бекхэм Кастро битта ва Элиас Пилстрём иккита тўп киритиб, жамоасининг устунлигини таъминлади.

Ўнг қанот ярим ҳимоячиси сифатида ўйнаган Беҳруз Каримов учрашувнинг 16-дақиқасида сариқ карточка олди. Орадан йигирма дақиқа ўтиб эса, ўзбек футболчиси катта саҳнага чиқди. Истеъдодли легионеримиз рақиб дарвозасини ишғол қилиб, биринчи тўпини киритди.

Шу тариқа, Беҳруз Каримов Швейцария чемпионатида гол урган биринчи ўзбек футболчиси сифатида футбол тарихига ўз номини муҳрлади.

Легионеримиз биринчи бўлимда огоҳлантириш олгани ва жамоа катта фарқ билан ғалаба қозонаётгани боис, мураббийлар штаби танаффусда Каримовни захирага олди.

Иккинчи бўлимда яна бир кутилмаган вазият юзага келди. Дубль муаллифи Элиас Пилстрём 47-дақиқадаёқ тўғридан-тўғри қизил карточка олиб, майдондан ҳайдалди.

Бир киши кам бўлиб ўйнаган “Лугано” баҳс охирида битта гол ўтказиб юборган бўлса-да,  ғалабани ушлаб қолди ва навбатдаги уч очкони қўлга киритди. Пешқадам жамоа саккизинчи учрашувдан кейин очколари сонини 22 тага етказди ва энг яқин таъқибчи – “Сьон” билан ўртадаги фарқни тўрттага етказди.

Эслатиб ўтамиз, Беҳруз Каримов 2026 йилги жаҳон чемпионатидаги ёрқин ўйинларидан кейин халқаро футбол ҳамжамиятига танилди. Бир неча хориж клубларидан чорлов олганига қарамай, ёш ҳимоячи легионер сифатидаги фаолиятини Швейцариядан бошлашга қарор қилди.

“Сурхон” клуби ўз футболчиси трансферидан 240 минг евро ишлаб олди ва кейинги савдодан яна 10 фоиз улуш олиш ҳуқуқига эга. Бугунги кунда ҳимоячининг трансфер қиймати 1 миллион еврога баҳоланмоқда.

Беҳруз Каримов “Лугано” клуби билан 2031 йилнинг ёзигача давом этадиган шартнома тузган.

Ҳусановдан бунақасини кутмаган эдик! “Сити” директори Абдуқодир ҳақида нималар деди?

“Манчестер Сити” Ҳусанов билан Қозоғистонга келмоқчи!

Ҳусановни бошқа клубга тавсия қилишди!

Каннаваро кўчадан кириб келган мутахассис эмас!