АПЛ ўйинларини қачон кўрамиз?

Англия премьер-лигаси раҳбарияти ҳамон коронавирус сабаб тўхтатилган мавсумни якунлаш ҳақида бош қотирмоқда.

Sky Sports тарқатган хабарга кўра, АПЛ клублари ўртасида ўтказилган видеоконференция йиғилишида мавсумни якунлаш бўйича турли вариантлар таклиф қилинган. Уларнинг барчасида мавсум 8 июндан кейин бошланади ва ўйинлар июнь, июль ҳамда август ойларида ўтказилади. Айтиш керакки, айни дамда премьер-лига жамоалари мавсум охиригача 9 ёки 10 тадан ўйин ўтказишлари лозим.

Шу билан бирга, ҳукумат мамлакатдаги вазият барқарорлашмагунича АПЛ ўйинлари бошланмаслигини ҳам маълум қилган. Британия ҳукумати мамлакатдаги карантин муддатини 7 майгача узайтирди.