АПЛда сентябрь ойининг энг яхши футболчиси аниқланди

"Манчестер Сити" ҳужумчиси Эрлинг Холанд Англия Премьер-лигасининг сентябрь ойидаги энг яхши футболчиси совринини қўлга киритди. Бу ҳақда лига расмий сайти хабар берди. Холанд мукофотни ютганидан сўнг ўз фикрларини ҳам билдирди.

—"Сентябрь биз учун муҳим ой бўлди. Жамоа сифатида жуда яхши футбол ўйнадик, мағлуб бўлмадик ва мухлисларимиз учун муҳим ғалабаларга эришдик. Мен жамоага голлар ва ўйин орқали ёрдам бера олганимдан хурсандман.Энди эса олдинга қараб, ҳар куни тинимсиз меҳнат қилишни давом эттирамиз, чунки халқаро танаффусдан кейин мураккаб ўйинлар кутмоқда. Умид қиламанки, шу даражани сақлаб қоламиз ва янада кўпроқ ғалабаларга эришамиз".

Маълумот учун, норвегиялик форвард якунланган ойда 3 та ўйинда майдонга тушиб, 5 та гол урди ва 1 та голли узатма амалга оширди.