АҚШ "янги Бразилия"ми? МЛСдан чиққан 10 та юлдуз билан танишинг!

Яқин ўтмишда МЛС, деганда, хаёлимизга биринчи бўлиб Лэндон Донован келган. Эндиликда, у Америка Қўшма Штатларида тобора янги юлдузлар билан жаҳон футболини забт этишда давом этмоқда. Биз "Transfermarkt" нашри берган маълумотларга суянган ҳолда, АҚШ футболидаги энг қиммат 10 та футболчи билан таништириб ўтамиз.

Рикардо Пепи - 8 миллион евро

"Даллас"нинг 18 ёшли ҳужумчиси ўтган мавсумни жуда яхши ўтказди. Келиб чиқиши мексикалик бўлган футболчи 31 ўйинда 13 гол ва 2 ассистни ўз ҳисобига ёзиб қўйди. Уни МЛСдаги энг келажаги порлоқ футболчилардан бири сифатида кўрсатиш мумкин. Сўнгги маълумотларга қараганда, Рикардога "Манчестер Юнайтед" жиддий қизиқиб қолган.

Дэрил Дейк - 10 миллион евро

"Орландо" клуби ҳужумчиси жисмонан жуда бақувват. Бўйи 187 см бўлган форвард 100 кг тош босади. Яқинда у "Барнсли" жамоаси билан шартнома имзолади. Қишда, ижара асосида ўз кучини Чемпионшипда синаб кўриши мумкин.

Бренден Ааронсон - 10 миллион евро

Сўнгги пайтларда АҚШ футболида малака ошириш мақсадида Европага кўчиб ўтаётган футболчилар сони кескин ортиб бормоқда. Бренден ҳам шулар жумласидан. Қаҳрамонимиз "Филадельфия" клубини "Зальцбург"га алмаштиргани бежиз эмас. Ааронсон АПЛ клубларидан бирида тўп суришни орзу қилмоқда. 21 ёшли ярим ҳимоячида бунинг учун барча имконият мавжуд.

Тимоти Веа - 12 миллион евро

У афсонавий Жорж Веанинг ўғли. Нью-Йорк шаҳрида туғилганига қарамай, унинг ёшлиги ПСЖ клуби академиясида ўтган. Аввалига, пойтахт клуби унга ишонч билдирмади. Натижада, Веа "Лилль"га ўтиб кетди. Ўтган мавусмда эса, айнан "Лилль" билан Лига 1 олтин медалларига эга чиқди.

Юнус Муса - 15 миллион евро

Вингер АҚШда туғилган. Кейин оиласи билан Италияга кўчиб ўтди. Бир фурсат Англияда ҳам истиқомат қилган. Унда Гана, Италия, Англия ва АҚШ ёшлар терма жамоасида тўп суриш борасида таклифлар мавжуд эди. Якунда океанорти вакиллари фойдасига қарор қабул қилди. Ҳозирда, 19 ёшли футболчи "Валенсия" шарафини муносиб ҳимоя қилмоқда.

Тайлер Адамс - 20 миллион евро

Тиниб-тинчимас таянч ярим ҳимоячиси аллақачон "РБ Лейпциг"нинг асосий фигураларидан бирига айланиб бўлди. "Нью-Йорк" академиясидан Германияга кўчиб ўтгач, фаолиятида кескин ўсиш кузатилди. Ҳозирда, у нафақат марказ, балки қанот ҳимоясида ҳам бемалол тўп суриши мумкин. Чинакам универсал. Бундай футболчилар мураббийлар учун майдонда тактик юришларни амалга оширишда қўл келиши аниқ.

Уэстон МакКенни - 20 миллион евро

Майдонда бир неча вазифани бемалол амалга оширишга қодир футболчи ҳозир "Ювентус"да ўзини кўрсатишга ҳаракат қилмоқда. У "Шальке" сафида скаутлар эътиборини қозонди. Афсуски, кўплаб таклифлар бўлишига қарамай, "кекса сеньора" вариантини танлади. Турин суперклубидаги вазият эса, унинг карьерасига салбий таъсир кўрсатди.

Сержиньо Дест - 30 миллион евро

"Барселона" аъзоси ҳам эндигина 21 ёшда. Келиб чиқиши нидерландиялик бўлишига қарамай, Дест танловни ўзи улғайган юрт фойдаси учун ишлатди. "Аякс" академиясида тарбияланган бўлишига қарамай, АҚШ терма жамоасини танлагани эътиборга молик. Ҳозир қаҳрамонимиз Ла Лигадаги энг кучли ўнг қанот ҳимоячиларидан бири саналади.

Жованни Рейна - 42 миллион евро

"Боруссия" Дортмунд клуби сўнгги йилларда иқтидорли футболчиларни етказиб бериш борасида сайёрамизнинг энг кучли клубига айланиб бўлди. "Нью-Йорк" академиясидан 2019 йилда келган Рейна ҳозир жамоасининг етакчи футболчиларидан бири. У дортмундликлар ҳужумлари ранг-баранглиги учун жавоб беради. Бугунги кунда креатив плеймейкерлар қай даражада қадрланишини инобатга олсак, Жованни тез орада янада кучли клублардан бири билан шартнома имзолаши аниқ.

Кристиан Пулишич - 50 миллион евро

У "Челси"да ҳар доим ҳам асосий таркибда майдонга тушмаса-да, АҚШдаги энг машҳур фуболчи саналади. "Аристократлар" сафида ЕЧЛда зафар қучган футболчи Эден Азарнинг ўрнини эгаллаши тахмин қилинган эди. Ҳозирча, Кристиан ўз имкониятларини 100 фоиз кўрсатиб берди, деб бўлмайди. Қаҳрамонимиз эндигина 23 ёшга қадам қўйди. Унда ўзини тўлиқ намойиш этиш учун етарлича вақт мавжуд.