“Арсенал” “Барселона” ярим ҳимоячисини нишонга олди

Лондоннинг “Арсенал” клуби “Барселона” ярим ҳимоячиси ҳисобланган Френки де Йонг учун курашга кирди. 
 
Хабарингиз бор, каталонияликлар нидерландиялик футболчининг жароҳатга мойиллиги сабаб, қишки трансферлар ойнасида таклифларни кўриб чиқмоқчи эди. Бироқ, жамоа бош мураббийи Ханс-Дитер Флик ўйинчига ишонч бағишлаб, клубда олиб қолишга муваффақ бўлди. Шундай бўлса ҳам, клуб мутасаддилари навбатдаги трансферлар ойнасида Френкини қўйиб юбориши мумкин. 
 
“Daily Mirror” нашрининг ёзишича, ҳозирда Микель Артета бошчилигидаги “канонирлар” футболчи атрофидаги вазиятни ўрганмоқда. Гарчи клуб ёзда ҳужум чизиғини кучайтиришни ўйлаётган бўлса ҳам, Томас Партига ўринбосар излашни бошлаб юборган. Манбага кўра, “тўпчилар” учун де Йонг энг яхши вариант сифатида кўрилмоқда. 
 
Маълумот ўрнида, 27 ёшли ҳавбек жорий мавсум “кўк-анорранглилар” сафида 25 та учрашувда иштирок этиб, 2 та гол ва 1 та голли узатмага муаллифлик қилди. Унинг клуб билан амалдаги шартномаси 2026 йилгача мўлжалланган бўлиб, Тransfermarkt порталидаги нархи 45 миллион евро деб баҳоланмоқда.