"Арсенал" ўз ҳужумчисини "Реал"га таклиф қилди

"Арсенал" ҳужумчи Габриэль Жезус билан хайрлашиши мумкин. Лондон клуби бразилиялик форвард учун янги жамоа изламоқда.

"Defensa Central" нашри берган маълумотга кўра, куни кеча "тўпчилар" Жезусни "Реал"га таклиф қилган. "Канонирлар"нинг фикрича, Габриэль "Лион"га ижарага кетган Эндрикнинг ўрнини эгаллаши мумкин эди. Бироқ, "қироллик клуби" бу таклифни рад этган. Мадридликлар қишки трансфер ойнасида ҳужумчи сотиб олишни режа қилмаган. 

28 ёшли футболчининг ҳозирда трансфер бозоридаги нархи 20 миллион еврони ташкил этади. Унинг лондонликлар билан амалдаги шартномаси 2027 йилнинг ёзида якунига етади. 

Эслатиб ўтамиз, форвард жорий мавсум Артета қўл остида 4 та учрашувда майдонга тушган. У мавсумнинг кўп қисмини жароҳат сабаб ўтказиб юборди.