Асабий "Навбаҳор", "қора тулпор" "Суғдиёна" ва сув остидаги "аждар!" Кимда ярим финалга чиқиш имконияти яхшироқ?

Куни кеча ЎзПФЛ Ўзбекистон кубогига қуръа ташлаш маросимини ўтказди. Унга кўра, 8 жамоа чорак финалдаги рақиблари ким эканлигини билиб олди. SPORTS.uz бизни олдинда кутаётган ўйинларда қайси клублар фаворит эканлигини тахмин қилиб кўради. Хўш, сизнингча қайси жамоа ярим финал йўлланмасини қўлга киритишга яқинроқ турибди?

"Насаф" - "Локомотив"

"Аждарлар" бироз рельсдан чиққан вагонларни тўхтатишга қодир

Ғалаба қозониш имконияти: "Насаф" - "Локомотив" - 70:30.

Ушбу учрашув картинаси Денис Коростиченконинг истеъфосидан сўнг кескин ўзгариб кетиши аниқ. Бизга маълум бўлишича, ўзимизнинг "Клопп" жамоа постини топширишни истамаган. Ҳатто, ўзини ишда қолиши учун кубок баҳсида "Бунёдкор" устидан ғалаба қозонишга ваъда ҳам берган. Раҳбарият омадли юришга қарамай, якунда Коростиченкони ортга қайтариб, Сервер Жепаровни жамоа бош мураббийи этиб тайинлади. Молиявий қийинчиликни сезаётган "темирйўлчилар" Коростиченкога қараганда бир неча баробар кўпроқ маош сўраган Сервер варианти танлангани бироз тушунарсиз.

Рўзиқул Бердиев жамоаси эса бой берилган очколарни ўрнини ғалабалар билан тўлдиришни бошлаб юборган. Сўнгги ўйинларда "Насаф" деярли тўхтатиб бўлмас кучга айланиб бораётганига гувоҳ бўлишимиз мумкин. Қаршида бўладиган баҳснинг қадри жуда баланд. Кубокдаги ғалаба келаси мавсумда ОЧЛ йўлланмасини тақдим этади. Шундай экан, нафақат Суперлига, балки кубок ўйинларида ҳам "Насаф" бор кучини ишга солишига шубҳа йўқ.

"Локо" янги мураббий қўл остида қандай тўп тепиши номаълум. Аммо ҳозирда "Насаф" Ўзбекистоннинг энг кучли жамоавий ўйинига эга клуби бўлиб турибди. Ижрочилар борасида ҳам "темирйўлчилар"да устунлик йўқ. Шундай экан, катта эҳтимол билан ярим финалнинг илк иштирокчиси Қарши клуби бўлади.

"Андижон" - АГМК

"Бургутлар"нинг тиши "кончилар"га ўтмаса керак

Ғалаба қозониш имконияти: 40 : 60

Кумиков бошқарувидаги "Андижон" жорий мавсумни жуда юқори темпда ўтказмоқда. Про-лигада узоқ таъқибдан сўнг "Турон" мағлуб этилди. Кубокда бу иш яна такрорланди. Энди эса клуб ярим финал йўлланмасига эга чиқиш имкониятига эга. Лекин чорак финалдаги рақиб жуда хавфли.

Миржалол Қосимов аллақачон принципиал рақибга айланиб улгурган "Металлург"ни енгиб, ҳақли равишда кучлилар қаторидан ўрин эгаллади. Мавсум бошида олмалиқликлар асосий фронтдаги позициясини бой бериб қўйганини кўрдик. Суперлигадаги кетма-кет йўқотилган очколар "кончилар"нинг чемпионлик пойгасидан тушиб қолишини таъминлади. Миржалол Қўшоқович мавсумни қутқариб қолиш учун олдиндаги 3 та ўйинда ғалаба қозониш кифоя бўлишини яхши сезиб турибди.

"Андижон" аслида бу ўйинда яққол аутсайдер. Бироқ баҳс ўз майдонида ўтаётгани қўшимча имконият тақдим этади. Ҳозир, "бургутлар" АГМКни таслим этиш даражасида кучли эмас, аммо стадиондаги атмосфера "мўжиза" яратмайди, деб ҳеч ким кафолат ҳам бера олмайди.

"Навбаҳор" - "Пахтакор"

"Титанлар тўқнашуви"

Имкониятлар: 50:50

Мана буни ҳақиқий триллер деса бўлади. Аввалига Суперлига доирасида бўлиб ўтадиган "Навбаҳор" - "Пахтакор" тўқнашуви "йил ўйини" деб аталган эди. Кубокдаги учрашувни "титанлар жанги" деб номлаймиз. Ҳар холда, анча йиллардан бери бундай принципиал рақиблар манфаати ўзаро ўйинда тўқнаш келмаган эди.

Бу баҳс фаворитини аниқ ҳеч ким айта олмаса керак. Барчаси икки жамоанинг қай даражада ўз ўйинини рақибга ўтказишига боғлиқ. Вадим Абрамов айтганидек, исталган рақиб сиз тақдим этган ўйиндан келиб чиқиб футбол кўрсатади. "Навбаҳор" ўзининг кучли прессинг ва прагматик футболини ўртага ташласа, "Пахтакор" класс эвазига бутун ўйинни "контроль" қилишга уринади. Ўйиндан ташқари омилларнинг барчаси "Навбаҳор" фойдасига ишлаши аниқ. 25 мингдан ортиқ мухлис "шерлар"га яхшигина босим ўтказиши турган гап.

Кубокдаги ўйиннинг бориши бир неча кун аввал бўлиб ўтган Суперлига доирасидаги баҳс натижаси қандай бўлиши билан чамбарчас боғлиқ. Агар "Навбаҳор" "йил ўйинида" ғолиб чиқса, "титанлар тўқнашуви"да анча хотиржамроқ ҳаракат қилиши, бемалол ўзи учун қулай бўлган 2-рақамда тўп тепиши мумкин. Агар "шерлар" лига доирасидаги ўйинда зафар қучса, иккинчи ўйинда рақибни ўз услубига зид тарзда ҳаракат қилишга мажбур қилиши мумкин.

"Сўғдиёна" - "Қизилқум"

Жуда аҳил коллектив бироз тарқоқ юлдузларга қарши

Ғалаба қозониш имконияти: 55:45

"Бўрилар" ҳозир шунчаки супер формада. Жамоа чемпионатда ҳам, ОФК кубогида ҳам анча дадил одимламоқда. Ўзи иштирок этаётган мусобақаларнинг учаласида ҳам "қора тулпор" мақомида иштирок этаётган Бақоев шогирдларига қуръа анча омадли келди. Биринчи навбатда чорак финал учрашуви Жиззахда бўлади. Қўшимчасига, "Пахтакор", "Насаф", "Навбаҳор" сингари рақибларни четлаб ўтиб, "Қизилқум" билан тўқнаш келиш имконияти пайдо бўлди.

"Сўғдиёна" ва "Қизилқум" мавсумни бир хил темпда бошлаганига қарамай, ҳозирга келиб иккиси турлича кўринишда. "Бўрилар" анча жипслашган вазиятда кураш олиб бораётган бўлса, "Қизилқум"да ички низолар бор эканлиги ҳақидаги миш-мишларни эшитиб турибмиз. Агар руҳий ҳолатдан келиб чиқиб фикрласак, юқорида қайд этилган икки аспект сабабли имконият "Сўғдиёна"да яхшироқ.

Никола Лазаревич жамоасини ўйинга яхши тайёрлай олса, "олтин изловчилар" Жиззахда "жанг" таклиф қилиши ҳеч гап эмас. Умуман олганда, номлар борасидаги бошқа ўйинлардан орқада қолса-да, чорак финалдаги энг томошабоп учрашув айнан шуниси бўлиши тахмин қилинмоқда. Қани кўрайликчи, "Сўғдиёна" кубокдаги ғалабага қай даражада тайёр? Ёки "Қизилқум" ўзи ҳақидаги барча миш-мишларга кетма-кет ғалабалар билан чек қўядими? Воқеалар ривожини SPORTS.uz да кузатинг!

Яҳёхўжа Улуғхўжаев