Ашаддий рақиб Файзуллаев трансферига муносабат билдирди
Ўзбекистон миллий терма жамоаси ҳужумкор футболчиси Аббосбек Файзуллаевнинг ЦСКАдан “Истанбул Башакшеҳир”га кўчиб ўтгани ҳали ҳамон Россия футбол жамоатчилиги вакиллари орасида кенг муҳокама қилинмоқда.
Sports.uz портали 21 ёшли футболчимиз ҳақидаги фикр-мулоҳазаларни ўзбекистонлик футбол ишқибозлари эътиборига ҳавола этади.
Сергей Семак, “Зенит” бош мураббийи:
Аббос кейинги вақтда бошланғич таркибга кам киритилаётган эди ва ЦСКАда ўйин тизимини яратадиган ўйинчилар қаторидан четга чиқиб қолаётганди. Бу аввалги бош мураббий Марко Николич жамоага олиб кирган тактик схеманинг таъсири.
Афсуски, бу усул унга мос эмас, “ромб”да Файзуллаевга муносиб жой топилмади. Камроқ ўйин амалиётига эга бўлаётган эди, бошқа клубга ўтиб кетди.
Аммо Россиядаги фаолияти давомида жуда ёқимли таассурот қолдирди. Аббос жуда ёрқин ўйинчи, янги клубида муваффақият ёр бўлсин. Мухлисларини хурсанд қилишини, ўзига берилаётган ўйин вақтидан ва клубга келтираётган ютуқларидан ўзи ҳам қониқишини, мамнун бўлиб юришини тилайман.
Сергей Кирьяков, футбол мураббийи:
Аббосбек Файзуллаев ва Вилиан Рошанинг ЦСКАдан кетгани жамоага салбий таъсир қилади, деб ўйлайман. Лотин Америкасидан жамоага олиб келинаётган ёшлар қанчалар талантли бўлмасин, топ-клубларда уларнинг мослашишига ва кўникишига вақт ажаратиш имкони йўқ. ЦСКА келажак учун ишлаяпти, деб бўлмайди. Қачонгача шундай қилиш мумкин?
Мухлислар жиддий натижаларни, чемпионлик учун курашни соғиниб қолди. Ўтган мавсумга кўра, ЦСКА шу йўналишда ишлайди, деган умид пайдо бўлганди. Лекин амалда бошқа нарсани кўряпмиз, мураббий кетди, етакчи ўйинчилар кетяпти. Бу ерда бошқа гап бор шекилли.
Энди йўқотишларга қарамай, ЦСКА қисқа фурсатда яна яхши ўйнашни бошлайди ва жанговар жамоага айланади, деб умид билан кутамиз.
Игорь Акинфеев, ЦСКА дарвозабони:
Бизни палов ейишга ўргатиб қўйиб, ўзи учиб кетди. Аббос, омад!
Милан Гайич, ЦСКА футболчиси:
Аббос биз билан чиройли хайрлашиб кетди. Мен унга омад тилайман. Аббос яхши инсон ва зўр футболчи. Файзуллаев Туркияда ҳам ўз иқтидорини намойиш қила олади ва жаҳон чемпионатини юқори даражада ўтказишига умид қиламан.
Эслатиб ўтамиз, Аббосбек Файзуллаев “Пахтакор”дан ЦСКАга 2023 йилнинг августида трансфер қилинган. Икки мавсум давомида 21 ёшли футболчимиз “армиячилар” сафида жами 72 та учрашувда майдонга тушиб, саккизта гол ва 22 та ассист қайд этди.
ЦСКА футболчиси сифатида Россия чемпионати бронза медали, мамлакат кубоги ва Суперкубоги соҳиби бўлди. Шунингдек, Файзуллаев Осиёнинг энг яхши ёш футболчиси номинацияси ғолиби ҳисобланади.
Фикрлар