"Аслида пенальтини бошқаси тепиши керак эди". 11 метрдан гол уролмаган Убайдуллаев бош мураббийни ранжитди...ми?

Мавсум бошидан бери қийин дамларни ўтказиб келаётган Фарғонанинг “Нефтчи” клуби илк бор кетма-кет иккита ўйинда ғалаба қозонишга муваффақ бўлди. 17-турда “Қизилқум” 2:1 ҳисобида таслим этилди. 18-турда эса сафарда “Бунёдкор”ни ҳам яна шу ҳисобда енгди. Яна бир гап: “Нефтчи” бу йил илк бор меҳмонда уч очкони қўлга киритди.

Янги бош мураббий Виталий Левченконинг услуби аста-секин ўз самарасини беришни бошлагандек. Яқинда клуб раҳбарияти жамоа аъзолари билан яна танқидий руҳда йиғилиш ўтказгани ёдимизда. Бу ҳам қайсидир маънода жамоага яхши томондан таъсири сезилмоқда. Орада “Нефтчи” кетма-кет уч марта дуранг ҳам ўйнади. Ҳозирча Левченко “Нефтчи” бошқаруви остида 4 та учрашувда қатнашди. Натижалар шундай: 2 ғалаба, 1 дуранг ва 1 мағлубият.

“Бунёдкор”га қарши ўйин шуни кўрсатдики, “Нефтчи” ўйинида нимадир бор. Ҳар ҳолда жамоа 1:0 ҳисобидаги мағлубиятдан чиқиб кета олди ва якунда 2 та гол урди. Турдан-турга жамоа ўйини ўзгариб бормоқда. Олдингидек шижоатсизлик кўринмаяпти. Агар “Бунёдкор”га қарши ўйини таҳлил қилинса, ҳимоядан ҳужумга ўтишда тезкорлик кўзга ташланди ва комбинациялар ҳам яхши шаклланяпти. Бунда Лутфулла Тўраев асосий ролда.

Аммо “Бунёдкор” билан баҳсда “Нефтчи” руҳий томондан “синиб” қолиши ҳам ҳеч гап эмасди. Гап шундаки, “Қалдирғочлар” учрашувни яхши бошлашди ва легионер ўйинчиси Побулич ҳисобни очди. Ўйиннинг кулминацион нуқтаси биринчи бўлим охирларида юз берди. 45+2-дақиқада “Бунёдкор” дарвозаси томон пенальти белгиланди. “Нефтчи” ҳужумчиси Шаҳзод Убайдуллаев бу ишни бажарди. Аммо гол уролмади. Бундан Виталий Левченко жуда дарғазаб бўлди. Лекин Убайдуллаевнинг бахтига жамоадошлари охиригача курашишгани эвазига бўлимнинг охирги сонияларида гол уриб ҳисобни тенглаштиришди. Бош мураббийнинг эътирозидан сўнг танаффусдан кейин Шахзодни ўйиндан олса керак деб ўйлагандик ва амалда ҳам шундай бўлиб чиқди. Иккинчи бўлимда Мирзоҳид Ғофуровнинг ажойиб голи эвазига “Нефтчи” ғалабани илиб кетди.

Сал қолса, Убайдуллаевнинг пенальтидан фойдалана олмагани жамоага таъсир қилиши мумкин эди, аммо фарғоналиклар вазият бундай бўлишига йўл қўймади. Шаҳзод Суперлигада 3 та ва Кубокда 1 та гол урди. Суперлигадаги голларини у асосан пенальтидан урган. Бундан ташқари, амалга оширилмаган пенальтилар ҳам бор. Аброр Исмоилов билан Сирожиддин Қўзиев хам 11 метрлик жаримадан гол ура олишмаган. Бу ҳолат Убайдуллаевда икки марта юз берди. Бундан аввал 15-турда “Нефтчи”нинг “Пахтакор”га қарши ўйинида ҳам Шаҳзод пенальтидан фойдалана олмаганди. Демак, у кетма-кет иккинчи марта пенальтидан гол ура олмади. Юқорида бежизга тўхталмадик, ҳужумчи “Бунёдкор”га пенальтидан гол ура олмагач, шундан кейин биринчи бўлимдан сўнг алмаштириб юборилди.

“Нефтчи” устози Левченко билан ўйиндан кейин айнан пенальти масаласида гаплашдик. Ўша 11 метрлик жаримадан гол ура олмагач, мураббийнинг эътирозга берилиши ва танаффус вақтида уни алмаштириб юбориши бизда айрим тахминларни келтириб чиқарди. Натижада бу масалада мураббийнинг фикрларини билишга қизиқдик.   

“Аслида пенальтини бошқа ўйинчи тепиши керак эди. Лекин мен уни бошқа сабаб билан захирага олдим. Чунки менга олдинги чизиқда тажовузкор ва прессинг керак. Афсуски, биз бошида мана шу жиҳатларда оқсадик. Шу сабабдан ҳам Убайдуллаевни алмаштирдим.

Ўйин осон кечгани йўқ. 11 метрли жарима тўпидан фойдалана олмаганимиздан кейин ҳам ўйин назоратимизни қўлимизга олдик ва ўйинни ўзимиз хоҳлаган даражада ташкил қила олдик”, - дейди Левченко.

“Нефтчи”да энди афтидан пенальтини амалга ошириш учун бошқа ўйинчига имконият берилади. Бунга қадар Убайдуллаевдан ташқари Аброр Исмоилов билан Сирожиддин Қўзиев ҳам пенальтидан фойдалана олмаганди. Бизга маълум бўлишича, эндиликда Лутфулла Тўраев пенальтиларни ўзи амалга оширади.