Асрор Алиқулов: "Кўпроқ тўпсиз ўйнадик, рақиб кучлими, ҳимояланишни ҳам билишимиз керак"

“Машъал” клуби бу турда Термизда номинал мезбон сифатида майдон эгалари ҳисобланган “Сурхон”га қарши баҳс олиб борди ва унда ҳисоб очилмади – 0:0. Беллашувдан кейинги матбуот анжуманида “Машъал” бош мураббийи Асрор Алиқулов саволларга жавоб қайтарди.

- “Сурхон” Суперлига стартини оғирроқ бошлади. Кейинчалик яхши натижаларга эришишга киришди. Яхши ўйин кўрсатяпти. Тўп билан энг кўп муомала қиладиган жамоалардан бири дейиш мумкин. Жамоада тўп назорати яхши йўлга қўйилган. Биз ҳам шунга яраша тайёрландик. Учрашувни яхши бошладик. Аста-секин тўп назоратини “Сурхон”га бериб қўйдик. Футболчиларимизни “Сурхон” томонидан бўладиган босимга ҳам тайёрлагандик. Бу ўйинда яримта имконият бўлиши мумкин эди ва шундай ҳам бўлди. Афсуски, гол ура олмадик. “Сурхон” ҳам, биз ҳам ютиб кетишимиз мумкин эди. Кўпроқ тўпсиз ўйнадик. Бугунги меҳнат учун йигитларга раҳмат.

- Иккинчи бўлимдаги ўзгаришлар бўйича. Футболчилар етарли даражада ўзгартирилмади. Бунга нима сабаб эди?

- Бу биринчи навбатда ўзимизни имкониятимиздан келиб чиқиб. Иккинчи сабаб эса, “Сурхон” футболчиларининг имкониятлари. Позицион ўйин кўрсатмоқчи эдик. Ким кимга қарши ўйнай олади? Шуни ҳам ҳисобга олдик. Қийин ҳолатда эдик. Шунга захирадан ўйинчи туширишимиз ҳам чўзилди. Ҳар томонлама ўйлаб, бу учрашувга мос келадиган футболчиларни туширдик.

- Сизни Ўзбекистон миллий терма жамоасидаги ажойиб фаолиятингиз орқали ҳам яхши эслашади. Ҳар бир мураббий ўзи ўйнаган позицияга ҳам эътибор қаратади. “Машъал”нинг ўйинларини кузатадиган бўлсак, ҳимояда заифликлар кузатилмоқда. “Сурхон”даги ижрочиларнинг етишмаслиги ҳисобига гол урилмади.

- “Сурхон”да ижрочилар бор. Рақибнинг ҳужумларига қараб ҳимояланишга ҳаракат қилдик. Шунинг учун кам вазиятлар бўлди. Футболчиларимиз “Сурхон”нинг қисқа паслари ва тезкорлик билан жарима майдони ичига киришларига тайёр эди. Савияга келадиган бўлсак, футболчиларни кечроқ йиғдик. Жуда кўп марказий ҳимоячиларни алмаштирдик. Бу томонлама ҳам ишлаяпмиз. Улардан яхши ва ишончли ўйин кўрсатишларини кутамиз.

- Жамоанинг мақсадлари қандай?

- Бу янги жамоа. Таркибда янги ўйинчилар кўп. Биринчи йилги мақсад ўз ўрнини топиш. Суперлигада ўрнимизни сақлаб қолишимиз керак. Давралар оралиғида селекция ишларини олиб борамиз. Вазифани уддалай олсак, келаси йили бизга анча осонроқ бўлади.

- “Машъал” ўтган турда “Шўртан”ни мағлуб этди. Бугун ҳам жамоангиз қайсидир маънода ўша услубда ўйнади. “Машъал” иккинчи рақамли бўлиб ўйнаб, қарши ҳужумларда жазолаяпти. Бу Асрор Алиқуловнинг стратегиясими ёки...

- Биринчи навбатда рақибга қараймиз. Ҳужумкор ўйнамоқчимиз, сизда ярим ҳимояда тезкор, тез фикрлайдиган ўйинчилар керак. Чунки қарама-қаршиликни ҳисобга олишимиз керак. Бугун ҳам ўйин стартидан ҳимояга ётмадик. Тўпни назорат қилишга ҳаракат қилдик. Ўйлайманки, дастлабки 10 дақиқада жамоа яхши кўринди. Кейин тўп назоратини бериб қўйдик ва ҳимояланишга мажбур бўлдик. Ўйин стартидан ўз имкониятимизни кўрамиз. Ўйин давомида қандай кетишини кузатамиз. Рақиб кучлими, ҳимояланишни ҳам билишимиз керак. Рақиб устунлик қилгани учун кўп кучимизни ҳимояга қаратдик.

- “Машъал” ҳимояланди ва қарши ҳужумда ўйнади. Нима сабабдан иккинчи бўлимда тезкор ўйинчилар майдонга туширилиб, ўйинга янгилик киритилмади?

- Тезкор футболчилар-а? Бу бизда ҳам муаммо. Техник қобилияти, тезкор футболчилар керак бўлади. Якка курашларда ҳам устун бўлиши лозим. Қарши ҳужумда ўйнаш учун сизга тезкор футболчилар зарур. Шунинг учун биз бор имкониятимиздан фойдаланиб футбол ўйнадик.