Асрор Алиқулов: "Кубок керак эмас, деган фикр бўлмаган"

Ўзбекистон Кубоги гуруҳ босқичидаги илк ўйинда “Машъал” уйида “Шўртан” билан 0:0 ҳисобида дуранг қайд этди. Учрашувдан кейинги матбуот анжуманида мезбонлар бош мураббийи Асрор Алиқулов қатнашди.

- Биринчи навбатда бу дерби. Иккинчидан, ўйинга тайёргарлик кўришда ротация қилдик. Ёш футболчиларни жалб қилдик. Учрашув бошидан ўйин назоратини қўлга олдик, яхшироқ кўриндик. Афсуски, қизил карточкадан кейин майдонда 10 киши қолдик. Шундан кейин кўп ҳимояландик. Ҳужумлар уюштиришга ҳаракат қилдик. Аммо учрашувнинг 80 дақиқасини бир футболчи кам бўлиб ўтказдик. Камчилигимизни ҳисобга олганда, бир очкони ёмон натижа деб ўйламайман. Йигитларга бугунги меҳнатлари учун миннатдорчилик билдираман.

- Деярли асосий таркибдан фойдаланмадингиз. Бу жамоани гуруҳдан 100 фоиз чиқа олишига ишонганингизми ёки клубга Кубок баҳслари керак эмасми?

- Ҳамма вақт керак. Жамоадаги ҳар бир футболчини таклиф қилганмиз ва шартномалар тузганмиз. Барча ўйинчи жамоа шарафини ҳимоя қилиши керак. Кимлар майдонга тушса ҳам ҳар доим ғалаба учун ҳаракат қиламиз. Бугун ғалаба қозониш мақсади қўйилганди. Бизда ротациялар бўлди, “Шўртан”да ҳам айрим позицияларда ротациялар юз берди. Биз томондан ҳеч қанақа Кубок керак эмас, деган фикр бўлмаган.

- Гуруҳда “Шўртан”ни ҳисобга олмаганда нисбатан кучсизроқ жамоалар тушиб қолди. “Олимпик” билан “Иштихон” бор. Ушбу ўйинда эса кутилмаганда “Олимпик” “Иштихон”га ютқазиб қўйди. Кўриниб турибдики, “Шўртан” ҳам, “Машъал” ҳам нисбатан иккинчи таркиб билан майдонга тушишди. Лекин “Олимпик”нинг мағлубиятидан сўнг сизда қандайдир хавотирли ҳолатлар вужудга келмаяптими?

- Ўйин давомида ҳисобни билганимиз йўқ. Сиздан билдик. “Иштихон”ни билмаймиз, нотаниш жамоа. Ҳисобдан чиқариб бўлмайди. Футболда ҳар хил вазиятлар бўлади. Ҳар бир жамоага ҳурмат билан қараш лозим. Тан олиш керак, бошқа гуруҳларга қараганда, бизники анча осон гуруҳ. Айрим гуруҳларда эса Суперлига грандлари ўрин олишган. Ҳар бир учрашув осон кечмайди. Кейинги ўйинларга ҳам муносиб тайёргарлик кўрамиз.

- Майдонга туширган ёш футболчилардан кўнглингиз тўлдими? Улардан бири эса қизил карточка олди...

- Тайёргарлик давомида уларга анча эътибор қаратдик. Тўп йўқотилгандан кейин узун пас оширилди. Ёш футболчимизда озгина камчиликлар сезилиб қолди. Биз ҳужумда эдик, тўп йўқотдик, битта пас билан у ҳам позициясини йўқотди. Рақиб ҳужумчисини қочирди, охирги фол. Қолган футболчиларга келсак, 11 га 11 ўйнаганда барчасига баҳо бериш мумкин бўларди. 10 киши бўлиб қолганимиздан сўнг йигитларимиз кўпроқ меҳнат қилишди, кўпроқ югуришди. Бўш зоналарни ёпишди. Ҳеч кимга эътирозимиз йўқ. Имконият даражасида ҳаракат қилдик, деб ўйлайман.