Асрор Алиқулов: "Майдонда йўқолиб қоладиган ўйинчилар жамоага минус олиб келади"

Ўзбекистон Кубоги нимчорак финал босқичида про лига вакили “Машъал” ўз майдонида Суперлига иштирокчиси “Қизилқум”ни қабул қилди. Қизиқарли кечган баҳсда меҳмонла 1:3 ҳисобида ғалаба қозонди. “Машъал” эса Кубокдаги юришини тўхтатди ва мусобақани тарк этди. Ўйиндан кейинги матбуот анжуманида “Машъал” бош мураббийи Асрор Алиқулов мағлубият сабаблари билан ўртоқлашди.

- Биринчи навбатда “Қизилқум” жамоасини кейинги босқичга чиққани билан табриклаймиз. Кўпроқ ҳимоявий ўйин танлади. Қарши ҳужумга тушиб қолмасликни уқтиргандик. Биринчи голли вазиятни биз яратдик, бироқ гол ура олмадик. Ҳисобда ортда қолаётганимизда мувозанатни тикладик. Ўша ҳолатда жамоа бир неча дақиқа яхши ўйин намойиш қилди. Экстра таймларда мувозанатни йўқотиш, чарчоқ, балки савияли футболчилар етишмаслиги дейиш мумкин ва шунинг ҳисобига иккита гол ўтказиб юбордик.

- “Машъал” ҳисобни тенглаштирган вазиятда захирадан майдонга тушган ўйинчилар ҳал қилдилар. Жамоалар тенгма-тенг курашди. Аммо охирида ўтказиб юборилган иккита гол аламли бўлди. Йигитлар чарчаб қолишдими ёки бошқа сабаблари борми?

- Гол киритилган вазиятда захирадан майдонга туширилган футболчилар ўзларини кўрсатишди. Бу Суперлига жамоаси эди. Ҳужумда бизга тезлик керак эди. Шуни эвазига тезкор ҳужумга ўтдик, бўшлиқ ярата олдик ва гол урдик. Биз мана шундай ўйин кўрсатишни уқтиргандик. Аммо бошқа ҳолатларда йигитларга тезлик ва ёки тез фикрлаш етишмади. Биринчи бўлимда ҳам яхши ҳужумлар қилдик, аммо айтганимдек, тезлик етишмади. Захирадан тушган ўйинчилар бир-иккита эпизодда яхши ўйнашди. Аммо ҳозирги футбол ва “Қизилқум” жамоасини ютиш учун бир-иккита эпизодда ўйнайдиган футболчи ҳамда кейинчалик қанчадир дақиқага йўқолиб қоладиган ўйинчилар жамоага минус олиб келади. Сусайишимиз ҳам шунда. Улар бироз яхши ўйнашди ва кейинги дақиқаларда майдонда йўқолиб қолишди.

- “Қизилқум” захира дарвозабони билан ўйнади, легионерлар хизматидан фойдаланмади. Олдин матбуот анжуманида “Қизилқум” легионерлари билан кучли жамоа дегандингиз. Демак, “Қизилқум” маҳаллий ўйинчилари билан ўйнаб ютди ва шу ҳолатида ҳам “Машъал”дан устун жиҳатлари борми?

- Ўйин тенгма-тенг ўтди ва бу борада Жамшид Саидовнинг фикрига қўшиламан. Аммо, барибир голли вазият ёки ноодатий фикрлаш ҳолатларида футболчиларнинг савияси роль ўйнайди. Ғиёсовни ўйинга тайёрланиш жараёнида уни тезлиги ва дриблинги ҳақида йигитларимизга уқтиргандик. Уни қанотда кутгандик. Аммо легионер ҳужумчиси кетгани учун у олдинда ҳаракат қилди. Маҳаллий футболчилари ҳам яхши. Бизни футболчиларни чарчаб қолганидан кейин рақиб таркибида захирадан Жуманқўзиев ва бошқа ўйинчиларнинг тушиши ўз тактикаси бўйича мевасини берди. Хатоларга келсак, тўпни тепиб юбориш футболчилар учун қийин иш эмас. Ўйлайманки, ўйинчилар кўпроқ мувозанатни йўқотдилар. Чарчаб қолди дейиш ҳам нотўғри. Ҳаракат бўлди, аммо индивидуал хатолар эвазига гол ўтказдик.

- “Машъал” ўйинни экстра таймларгача олиб боришни кўзлаганмиди?

- Йўқ, кўзламагандик. Ўйинга тайёргарлик жараёнида Хумоюн Муртазоевни тайёрлагандик. Лекин у иккита ўйинга четлатилдими, билмадик. Кейинчалик учрашувга яқин у учта учрашувга четлатилганлиги аён бўлди. Натижада ҳужумчини алмаштиришга тўғри келди. Чунки олдинги ўйинда Хумоюнни лицензиясини беришганди ва уни майдонда тўп суришига рухсат берилди, деб ўйлагандик. Асосий таркибда майдонга туширишни мақсад қилгандик. Кейин эса қисқа вақт ичида ўзгартириб, ёш ҳужумчига имконият бердик. Хумоюн бўлганида ҳужумда янада яхшироқ вазиятларни яратардик.