Асрор Алиқулов: "Савияда катта фарқ бор, кучимиз етмади"

“Машъал” клуби яна мағлубиятга учради. Бу сафар Олмалиқда “Нефтчи”ни қабул қилган муборакликлар 1:4 ҳисобида имкониятни бой берди. Баҳсдан кейин “Машъал” бош мураббийи Асрор Алиқулов матбуот анжуманида иштирок этди.

- Ўйинга киришиб кетишга жамоа ўзида ишонч топа олмади. Ёмон бошладик, дарвозамиздан тезкор гол олиб чиқдик. 4 та голдан 3 тасини стандарт вазиятдан ўтказиб юбордик. 2:1 бўлиб турганида иккинчи бўлимнинг 10-15 дақиқасида яхши кўриндик. Кейин бурчакдан тўп оширилишидан сўнг учинчи голни ўтказиб юбордик. “Нефтчи” анча ишончли кўринди. Савияда катта фарқ бор, барибир ҳаракат қилдик. Афсуски, кучимиз етмади.

- Иккинчи бўлим бошида дарвозабон алмаштирилди. Иккинчи голда қанчалик дарвозабоннинг айби бор?

- Бурчакдан гол уришди. Ўйлайманки, у қийин тўп эмасди. Биринчи голда ҳам ишончсиз бўлди. Агар тўпга ета олмаса дарвозани тарк этмаслик керак. Шу боис бугун ишончсиз кўринди. Шунинг учун иккинчи бўлимда дарвозабонни алмаштирдик. 2:1 ҳисобида “Нефтчи”га босим ўтказишга ҳаракат қилдик. Шу туфайли рақибни бироз қийин ҳолатга тушира олдик, дейиш мумкин. Лекин бу вақтинчалик бўлди. Охирида “Нефтчи” бемалол ҳимояланди, бизни ҳужумга ўтишга йўл қўймади.

- Биринчи ва иккинчи гол ўйин тақдирини ҳал қилди. Бу “Машъал”га руҳан таъсир қилди...

- Бу тезкор гол. Андижонда ҳам тезкор гол ўтказиб юбордик. Қўпол хато. Таркибда ротациялар қилишга ҳаракат қиляпмиз, кимдир ишончлироқ ўйнаши учун. Барибир ҳимоя чизиғида ҳам лидер футболчи етишмаяпти. Бугун йирик ҳисоб қайд этилди. Йигитлар меҳнат қилишяпти. Лекин “Нефтчи”нинг савияси ҳам устунлик қилди. Стандартдаги оддий ҳолатларда голлар ўтказиб юборишда ҳимоя чизиғи ва дарвозабонимиз сусткашликка йўл қўйишди.

- Жамоангиз Андижонда кўрсатган ўйинини намойиш қила олмади. Ўша учрашувда вазиятлар кўпроқ бўлганди. Бу сафар ундай бўлмади. Ёки футболчиларга жисмоний куч етишмаяптими?

- Жисмоний ҳолат деган сўзни ишлатмаган бўлардим. 90 дақиқа ўйнашяпти. Салифуда кичик жароҳат бор эди, у дам олди. Жисмоний ҳолатида муаммо борлигини билардик. “Нефтчи”га қарши кўпроқ тўпсиз ўйнаймиз, барибир кўпроқ ҳимояланамиз. Шу боис уни кучи етмаслигини ҳам билардик. Қолган футболчилар чарчаб қолиб, югура олмай қолганидан эмас. Кўпроқ бу савияга боғлиқ. Голларни стандартдан ўтказиб юбордик. Айтганимдек, қайсидир ҳолатларда босим қилдик. Аммо “Нефтчи” босимдан чиқиб кета олди.