Асрор Алиқулов: "Талабга кўнган футболчилар билан ишлаяпмиз"

Суперлиганинг 9-турида “Машъал” клуби Ғузорда “Қизилқум”ни қабул қилди. Қизиқарли ва жанговар ўтган учрашув 2:2 ҳисоби билан якун топди. Муборакликлар бош мураббийи Асрор Алиқулов учрашувдан кейин айрим саволларга ўз жавобини айтди.

- Ўйинни яхши бошладик. “Қизилқум”ни ўрганиб чиққандик. Бўйдор футболчилар, стандарт ҳолатлар, узун паслар, уларнинг ҳужум вариантлари ва ўзимизнинг ҳужум вариантларимизни ўргандик. Биринчи бўлимда яхши ҳужумлар уюштирдик, ҳаракат қилдик ва гол урдик. Иккинчи бўлимни жуда суст бошладик. Аста-секин футболчилардан ишонч йўқола бошлади. Оддий ҳолатда тўп йўқотдик, бу вазиятда ҳимоячимиз рақиб билан курашда йиқилиб тушди ва гол киритилди. Барибир футболчилар катта меҳнат қилишди. Шунинг эвазига яна тўп киритдик. Ўйин охиригача ҳужум қилиш, қарши ҳужумга тушиб қолмаслик борасида иккиландик. Дуранг ҳам ёмон натижа эмас.

- “Қизилқум” клубида ишлагансиз. Шундан келиб чиқсак, бугун сизга жамоани ўрганишда қийинчилик туғдирмадими?

- Бу ҳақида ўйлаганим йўқ. Ўша таркибдан бир-иккита футболчи қолган. Ҳозир таркиби кучли. Легионерларининг савияси ҳам паст эмас. Ўша таркибдан Ваҳобов ўйнаяпти. Ҳозир умуман бошқа таркиб. Мураббийнинг ўйин услуби бошқа. Уларнинг охирги 3-4 та учрашувларини кўриб чиқдик. Бу ўйинда бизга атлетизмда кучимиз етмаганлиги кўриниб турибди.  Айниқса, ҳимоядаги йигитларимизнинг бу борадаги имкониятлари пастроқлиги “Қизилқум” футболчиларининг савиясида кучсизлик қилдик.

- Муртазоев билан Машович иккитадан гол уришди. Қайси ўйинчини кучлироқ деб ўйлайсиз?

- Мени футболчим кучли (кулади). Тўғри, у бақувват. Ўйинларда тажовузкор ўйнаяпти, қанот вингери саналади. Ёмон легионер эмас. У ҳам имконият даражасида тўп суряпти.

- 9 та ўйинда 6 та гол. Бу камлик қилмаяптими?

- Кўп ўтказиб юбордик, буни ҳам тан олишимиз керак ва кам уряпмиз. Лекин бу Суперлига. Ечиниш хонасида футболчиларга айтдим, бизни ўйинчилар рақиб дарвозаси ёнида бош кўтаришга имконият беришмайди. Лекин биз мана шу томонлама уларга кўпроқ имконият бериб қўйдик. Зич ўйнаш – бу ҳозирда Суперлиганинг талаби. Шунга мос футболчи керак. Суперлига буни кутиб турмайди, аммо иложимиз йўқ.

- “Машъал” Суперлига ҳавосига тўлиқ мослашиб кета олди, дея оласизми?

- Киришиб кетдик. Ҳа, ёмон ўйинларимиз бўлди. Рақибдан қўрқиб эмас, бошидан тўп назоратини олишга ҳаракат қиляпмиз. Қайсидир ҳолатда тўп йўқотсак тез ҳимояланиш каби вазиятларга эътибор қиляпмиз. Қанот вингерларимизда Суперлигада тўп суриш борасида тажриба катта эмас. Айримлари илк бор тўп суришяпти. Улардан дастлабки йилдаёқ кўплаб голли паслар кутишимиз ҳам эртароқ. Аммо умид қиляпмиз.

- Ҳар ўйинда ўйинчиларнинг югургани, жисмоний ҳолатлари ҳисоблаб борилади.  “Машъал” футболчилари бир учрашувда ўртача неча километр югуришяпти ва уларни жисмоний ҳолатидан қанчалик қониқяпсиз?

- Ҳар ўйиндан кейин кузатамиз. Машғулот жараёнида ҳам бунга эътибор қаратамиз. Ўртача энг кўп югурган футболчимиз 12 километрдан кўп югуряпти. Аммо бунақа футболчи бизда камроқ. Айримларини позициясига қараб ёшини ҳам ҳисобга олишимиз керак. Бу беллашувда энг кўп югурадиган футболчимиз оилавий шароитига кўра қайдномага ҳам киритилмади. Бу Жавоҳир Абдуалимов. Тезкорлик томонлама ҳам кўп мақтана олмаймиз. Буни ҳам тан олишимиз даркор. Фақат айрим ўйинчиларимизгина яхши тезликка эга.

- “Машъал” Ғузорда ўйнашни бошлади. Бундан кейинги учрашувлар ҳам Ғузорда ўтадими?

- Шунақа бўлса керак. Буни раҳбарият ҳал қилади. Бу ўзимизни ёнимиздаги стадион. Ғузорда ўйнаш барибир уйда ўйнагандек яқинроқ. Раҳбариятга, ҳомийимизга ушбу майдонда тўп суриш имкониятини яратиб бергани учун миннатдорлик билдирамиз. “Шўртан” раҳбарларига ҳам раҳмат. Улар бизни майдон билан таъминлаб беришяпти.

- “Машъал” Суперлигада ҳар бир рақибга қарши тенгма-тенг ўйнаяпти. Барибир захира ўриндиғи етакчилар клубларникига қараганда кучсизроқ. Иккинчи давра олдидан буни тўлдириш учун қандай ишлар олиб бориляпти?

- Имкониятимизга қараб. Тузилган таркибдаги футболчиларга эътирозимиз йўқ. Чунки клубни имконияти ва талаби бор. Шу талабга кўнган футболчилар билан ишлаяпмиз. Ҳомийимиз, клуб бош директори томонидан маблағлар ўз вақтида тўланяпти. Мураббий сифатида оралиқда кучайишни хоҳлаймиз. Керакли позицияларни кучайтирсак жуда хурсанд бўлардик.

- Олдин “Машъал” академиясидан Элдор Шомуродов, Отабек Шукуров каби номдор футболчилар етишиб чиққан. Ҳозирги кунда академиядан асосий жамоага қўшилиб кета оладиган ёш, иқтидорлар борми? Уларни тайёрлаш жараёни қандай кетмоқда?

- Академия тўлиқ ишлаяпти. Фақат ўша пайтда академиялар сони камроқ эди. “Машъал” биринчи тузилган академия. Ҳозир улар кўп ва яхши иқтидорларни қаердандир топиб олиш муаммо. Бизда ҳар бир ёш тоифасида мураббийлар ишлашяпти. Фақатгина про лигадан тез чиқиб қолдик. Ёшларимиз бирданига про лигада ўйнамасдан туриб Суперлигада тўп суришга ҳали тайёр эмас. Буни U21 жамоамиздан ҳам билиш мумкин. Улларга озроқ вақт керак.