"Атлетик" футболчилари ҳам рози бўлишди

"Атлетик" расмий матбуот-хизмати хабарига кўра, коронавирус пандемияси ортидан Испанияда футбол мавсуми тўхтатилгани боис клуб футболчилари билан ўтказилган маошлар қисқаруви бўйича музокаралар ижобий якунланган.

Бильбаолик футболчилар пандемия вақтидаги молиявий зарбаларни юмшатиш мақсадида маошларини 17 фоизгача пасайтириш бўйича келишувга рози бўлишган.

Унга кўра, агар мавсум давом эттирилмайдиган бўлса, унда футболчилари маоши 17 фоизга, агар турнинг қолган баҳслари мухлисларсиз майдонда ўтказилса 6 фоизга қисқаради.

Испанияда мавсум тўхтатилгунича "Атлетик" турнир жадвалида 37 очко билан 10-ўринни банд этиб турган эди.