«Атлетико» футболчиси «Рома» билан тўрт йиллик шартнома бўйича келишувга эришди

Мадриднинг «Атлетико» жамоасида тўп суриб келаётган ҳимоячи Науэль Молина фаолиятини «Рома» клубида давом эттиради.

Журналист Маттео Моретто тарқатган маълумотларга кўра, аргентиналик футболчи Рим жамоаси билан шахсий шартнома борасида тўлиқ келишувга эришган. Хабарга кўра, Молина ва «Рома» ўртасидаги битим тўрт йилга мўлжалланган. Яқин кунлар ичида трансфер расман эълон қилиниши эҳтимоли катта экани таъкидланмоқда.

Аввалроқ оммавий ахборот воситаларида футболчининг трансфери римликларга тахминан 18 миллион евро атрофида тушиши ҳақида хабарлар пайдо бўлган эди.

Науэль Молина 2022 йил ёзидан буён «Атлетико» шарафини ҳимоя қилиб келмоқда. Испанияга йўл олишидан олдин у икки мавсум давомида Италия чемпионатида тўп суриб, «Удинезе» таркибида ўйнаган.