"Айрим чизиқларни кучайтириш режамизда бор" - "Қўқон-1912" бош мураббийи

Про лиганинг 11-турида “Қўқон-1912” ўз майдонида Бухоронинг “Ғиждувон” жамоасини қабул қилиб 5:2 ҳисобида ғалаба қозонди. Гарчи меҳмонлар учрашувда биринчи бўлиб ҳисобни очганига қарамай, мезбонлар вазиятни ўзгартира олдилар ва якунда 5 та гол урдилар. Ўз олдига Суперлига вазифасини қўйган “Қўқон-1912” учун ҳар бир ўйин муҳим. Жамоа бош мураббийи Муҳсин Низомиддинов эса “Ғиждувон”га қарши беллашувдан кейин айрим саволларга жавоб бериб ўтди.

- Чиройли ўйин бўлди, томошабоп ўтди. Худо хоҳласа, биринчи ғалабамизни ҳам бошлаб олдик. Барча мухлисларни, бизни қўллаб-қувватлаб турганларни ғалаба билан табриклайман. Ҳозир таъкидлаб ўтганимдек, ҳақиқий томошабоп, чиройли беллашув бўлди.

- Биринчи давра якунланишига бир тур қолди. Ёзги танаффусда таркибни кучайтириш режаси борми? Масалан, дарвозабон ёки ҳужумчими?

- Худо хоҳласа, ўйнаб турган футболчиларимдан 90 фоизга кўнглим тўқ. Уларга ишонаман. Ҳаммасини вақт кўрсатади. Айрим чизиқларни кучайтириш режамизда бор. “Арал”га қарши учрашувни ўтказиб олганимиздан кейин у ёғини ўйлаб кўрамиз.

- Бобур Қосимовни эрта захирага олдингиз. Уни ўйинидан қониқиш ҳосил қилмадингизми ёки...

- Биласизлар, Бобур Қосимов бир ой дам олди. Шундан сўнг “Сурхон”га қарши учрашувда майдонга туширдим. Тажрибали ўйинчи. Кўп югургани йўқ, машғулотларга ҳам ҳали тўлиқ мослашгани йўқ. “Сурхон” билан ўйинда имкон бердим, кўрдим. Мураббий айтганларини қиляпти. Бироз жароҳати борлиги, унга тўсқинлик қиляпти. 100 фоизга жароҳатидан фориғ бўлмади. Бугунги ўйинда уни яна кўрдим, асосий эътиборимизни ҳужумга қаратдик. Кўрдинглар, биринчи бўлиб дарвозамиздан тўп ўтказиб юбордик. Шундан сўнг ҳужум чизиғимизни янада кучайтиришимиз керак эди. Бу ерда тактик ўзгариш бўлди.

- Нукусдаги стадион сунъий. Ўша майдонда жамоа ўйнай оладими?

- (Кулади). Майли, чемпионат Регламенти бор. 18 июнь куни ўйнаймиз, Нукусдаги майдонда. Ҳаммада имкон даражасида бор. Худо хоҳласа, у ерда ҳам ўйнашга ҳаракат қиламиз.