Аюбхон Номанов: "Навбаҳор" ва "Насаф" совринли ўринлар учун курашмоқда
Cуперлига 23-туридан ўрин олган баҳсда Наманганнинг “Навбаҳор” жамоаси ўз майдонида Қаршининг “Насаф” клубини қабул қилади. Совринли ўринлар учун кураш олиб бораётган мазкур жамоалар ўртасидаги ўйиннинг кескин курашлар остида ўтиши эҳтимоли юқори.
“Лочинлар” ярим ҳимоячиси Аюбхон Номанов бўлажак учрашув борасидаги фикрлари билан ўртоқлашди. Бу ҳақда клуб матбуот хизмати хабар берди.
- Ҳар икки жамоа совриндорлар сафидан ўрин олиш учун курашмоқда. Шу боис, бўлажак баҳснинг муросасиз, шиддатли, кескин курашларга бой тарзда кечиши эҳтимоли юқори.
Ушбу ўйинга Андрей Антанасович Канчельскис бошчилигидаги мураббийлар штаби қўл остида жиддий тайёргарлик кўрдик. Қаршиликларга қарши кечадиган баҳсда майдонга ғалаба иштиёқида тушиб, мухлисларга қувонч улашишни ният қилганмиз. Фақатгина ишқибозлардан жамоамизни 12-ўйинчи сифатида бевосита стадионда қўллаб-қувватлашларини сўрайман. Бу эса бизга қўшимча куч-қувват бағишлайди ҳамда уларни ўз ютуғимиз билан хурсанд этиш учун майдонда барча имкониятимизни ишга соламиз, - деди футболчи.
Фикрлар