Азар "Челси"даги рекордини такрорлади

Лондоннинг "Челси" клуби вингери Эден Азар кеча "Вест Хэм"га (2:0) қарши ўйинда бўлиб ўтган Лондон дербисида дубль қайд этиб, жамоасининг муҳим ғалабасини таъминлади.

Бу 28 ёшли бельгиялик футболчининг мавсум расмий учрашувларда киритган 19-голи бўлди. Эътиборлиси, Азар шу тариқа ўзининг “аристократлар” сафидаги энг яхши натижасини такрорлади.

Таъкидлаш керакки, бунгача Азарнинг бу борадаги энг яхши натижаси 2014/15 йилги мавсумда қайд этилган эди. Ўшанда ҳам у бир мавсумда 19та гол уришга эришган. Аммо, мавсум якунига қадар яна бир нечта ўйинлар борлигини инобатга олганда, у ўз рекордини янгилаш имкониятига ега.

Эслатиб ўтамиз, сўнгги пайтларда Азарнинг ёзда “Реал”га кўчиб ўтиши борасида турли хабарлар тарқалдмоқда.