Aziz Amonov: "Kubok finalida stadionda evropacha muhit bo‘ladi, degan taxminim bor"

“Neftchi” klubi bu turda ham ochko yo‘qotdi. Farg‘onaliklar Andijondagi vodiy derbisida mezbonlarga qarshi qiyin o‘yinda 0:0 hisobida durang o‘ynadi va jamoalar bir ochkodan bo‘lishib oldilar.

Ushbu uchrashuvda “Neftchi” safida to‘p surgan hujumchi Aziz Amonov bir qator savollarga javob qaytardi.

- Azizbek, avvalo vodiy derbisi haqida so‘ramoqchiman. Taassurotlar qanday?

- Muhit ajoyib tarzda bo‘ldi. O‘yin asosan kurashlarga boy o‘tdi.  “Andijon” muxlislari har doimgidek stadionda tinim bilmay jamoasini qo‘llab-quvvatlashdi. Ularni bunday muxlislik qilishiga qoyil qolmasdan iloj yo‘q.

- Levchenko durang adolatli bo‘lganini aytdi. Siz ham shu fikrga qo‘shilasizmi?

- Chetdan qaraganda murabbiylarga ko‘proq ayon bo‘ladi.

- Birinchi davrada Farg‘onada jangovar durang kuzatilgandi. Ikkala davrada ham kuchlar teng keldi. Bu "Neftchi" bilan "Andijon"ni chindan kuchi tengligini ko‘rsatadimi?

- Derbida ishtiyoq yuqori bo‘lgani uchun shunaqa bo‘lsa kerak, yana bilmadim.

- "Andijon" endi 5 oktyabr kuni Kubok finalida "Istiqlol"da "Navbahor" bilan o‘ynaydi. Siz kimga muxlislik qilasiz? Jamoalarni imkoniyati qanday va nima kutyapsiz?

- Ikkala jamoaga ham omad tilab qolaman. Muxlislari ajoyib, ikkala jamoani. Stadionda evropacha muhit bo‘ladi, degan taxminim bor.

- "Neftchi" tobora sovrinli o‘rinlardan uzoqlashib borayotgandek tuyulmoqda. Jamoa nega barqarorlikka erisha olmayapti?

- Jamoaga har yili ko‘p yangi o‘yinchilar kelib qo‘shiladi. Bu barqaror o‘yin uchun vaqt talab kilinadi. Xudo xohlasa, tarkib 70 foizga har yili ushlanib qolinsa, o‘ylaymanki, siz aytgan barqarorlika erishsa bo‘ladi. Sovrinli o‘rinlar uchun oxirgi imkon qolguncha harakat qilamiz.

- Chempionlik "Nasaf"ga nasib qilishiga shubhangiz qolmadimi? Bu sizni sobiq jamoangiz...

- “Nasaf” shu yil mag‘lubiyatga uchramayapti. Demak, ular chempionlikka loyiq jamoa bo‘lib borishyapti. Ularga omad tilayman. “Nasaf” bu chempionlikni ko‘p kutdi. Hozir ularda ajoyib jamoa bor.

Shuhratbek Jo‘raev.