Азизбек Хайдаров: "Нима учун Каннаварони таклиф қилиб, бунча пул тўлаш керак эди?"

Ўзбекистон футболи афсонаси, Футбол ассоциацияси қошидаги миллий жамоаларнинг собиқ директори Азизбек Ҳайдаров "Жаҳон чемпионати — 2026" гуруҳ босқичи 2-туридаги Португалияга қарши ўйин (0:5) юзасидан кескин фикр билдирди.

Мундиал стартдаги икки мағлубиятдан сўнг италиялик мутахассис Фабио Каннаваро шогирдлари "К" гуруҳи жадвалида охирги ўринни эгаллаб турибди. Гуруҳ босқичининг сўнгги турида Ўзбекистон терма жамоаси учун ДР Конгога қарши баҳс ҳал қилувчи аҳамият касб этади.

— Биз бу ўйинни бутунлай бой бердик, — деди Ҳайдаров. — Ростини айтсам, умуман тушунмаяпман, Фабио Каннаваро нимага эришмоқчи бўлди. Биринчи голда ҳимоячиларимиз гўёки майдонда эмас, суратга тушаётгандек эди — ҳамма иш билан шуғулланишди, фақат ҳимоя ва тўпни олиш билан эмас. Бундай голларни жаҳон чемпионатида ўтказиб юбориш мутлақо мумкин эмас. Иккинчи эпизодда эса Аббосбек Файзуллаев тўпдан қочди. Умуман тушунмайман, нега бундай қилди. Билганимча, ҳали ҳеч ким футбол тўпидан ўлиб қолмаган. Бундай даражада ҳар бир вазиятда охиригача курашиш керак.

Ҳайдаровнинг фикрича, ўйин бошидаги айнан шахсий хатолар катта ҳисобли мағлубиятга замин яратди.

— Энг асосийси — Португалия каби жамоага шундай осон голлар урилишга йўл қўйсангиз, кейин ўйинга қайтиш деярли имконсиз, — дея давом этди мутахассис. — Биринчи голдан кейин ишончни йўқотдик, иккинчисидан сўнг янада оғирлашди. Жаҳон чемпионатида бундай даражадаги рақиблар бу каби хатоларни кечирмайди. Биз ўйинга қайтиб кира олмадик, яна учта гол ўтказиб юбордик ва натижада ўйин шундай йирик мағлубият билан якунланди. Бундай жамоаларга қарши биринчи дақиқадан охирги дақиқагача максимал даражада диққат билан ўйнаш шарт. Ростини айтсам, умуман тушунмайман, нега Фабио Каннаварони Ўзбекистон терма жамоасига таклиф қилиш керак эди. Нима учун унга бунчалик катта маош тўланяпти, тушунмайман. Шу маблағ эвазига ўз мутахассисимизга ишонса бўларди — у бизнинг футболни, футболчиларимизни ва менталитетимизни яхши билади.