Бабаян: “Навбаҳор” - Ўзбекистонда учта турнирда курашни давом эттираётган ягона жамоа!"

Осиё Чемпионлар Лигаси (ОЧЛ) саралаш баҳси доирасидаги “Ал-Вакра” – “Навбаҳор”(0:1) учрашувидан кейинги матбуот анжуманининг иккинчи қисмида жамоамиз бош мураббийи Самвел Вячеславович Бабаян иштирок этиб, ОАВ ходимларининг саволларига жавоб қайтарди.

Қуйида “лочинлар” устозининг фикрларини эътиборингизга ҳавола этяпмиз.

– Ассалому алайкум! Барчага хайрли кеч! Таъкидлаш жоизки, бу “Навбаҳор” учун тарихий ўйин бўлди. Боиси, жамоа сўнгги 23 йилдан буён қитъамизниг нуфузли мусобақасида иштирок этмаётганди. Кези келганида айтиш лозимки, биз ўз олдимизга  фақатгина саралаш босқичи баҳси билан чекланиб қолмасдан, жамоамиз учун қадрли бўлган стадионга ОЧЛ ҳавосини олиб кириш, ушбу турнир мадҳияси Наманганда жаранглашини истагандик ва бу ниятимизга етдик. Зеро, “Навбаҳор” мухлислари бунга ҳақлилар. Улар севимли жамоалари билан фахрланишлари учун бугун йигитлар майдонга ўзгача иштиёқ ва руҳда тушишди ҳамда зафар қучишди. Биз бу билан чекланиб қолмоқчи эмасмиз. ОЧЛ гуруҳ баҳсларидаги ҳар бир ўйин жамоамиз учун муҳим аҳамиятга эга бўлади.

Таъкидлаш жоизки, мен айрим статистик маълумотларни очиқламагандим.  Осиёда мазкур нуфузли мусобақада энг кўп иштирок этган мутахассисман.  Айнан шу тажрибамдан келиб чиқиб, максимал натижа кўрсатишга ҳаракат қилдим. Шунингдек, мен фаолият юритган аввалги жамоам икки марта ОЧЛ баҳсларининг ярим финалига  қадар етиб борганлигини ҳам эслатиб ўтмоқчиман. Ярим финалларнинг бирида эса ОЧЛ турнири янги ташкил этишганида қатнашганмиз.  

Жамоамиз мураббийлар штабининг тажрибаси ва футболчиларимизнинг даражасидан келиб чиқиб, бизга ОЧЛ гуруҳ йўлланмасини қўлга киритиш   вазифаси қўйилганди. Кейинги мақсадимиз гуруҳ босқичидан чиқиш бўлади. 

Мен кеча ўйин олдидан ташкил этилган матбуот анжуманида “Ал-Вакра” яхши ва шаклланган жамоа эканлиги ҳамда рақибимизни кучли мураббий бошқараётганлигини таъкидлагандим.

Бизнинг ўйин режамиз учрашув давомида ўзини оқлади ва биз максимал даражада учрашувни 90 дақиқада ҳал қилишга ҳаракат қилдик. 

Жамоамизни қўллаб-қувватлаш учун Қатарга етиб келган мухлисларга жамоамиз номидан миннатдорчилик билдирмоқчиман. Биз майдонга уларга қувонч улашиш ниятида тушамиз ҳамда мухлислар жамоамиз билан фахрланишлари учун барча имкониятимизни ишга соламиз.

Сўзим якунида шуни айтмоқчиманки, “Навбаҳор” - Ўзбекистонда учта турнирда курашни давом эттираётган ягона жамоа!