Бадавлат хоним “Тоттенхэм”ни сотиб олади ва ҳозирдан зўр мураббий топиб қўйди

Илгари “Ньюкасл” хўжайинларидан бўлган Аманда Стейвли хоним Англия Премьер-лигасининг жорий мавсумида инқироздан чиқа олмаётган “Тоттенхэм”ни сотиб олишни ва бош мураббийликка Эдди Хауни олиб келишни истаяпти.

Ўз вақтида Стейвли Саудия Арабистони Суверен фондига “Ньюкасл”ни сотиб олишда ёрдам берган. Хизматлари учун Аманда клубда 10 фоиз улуш ва директор лавозимини олган.

2024 йил ёзида Стейвли “Ньюкасл” билан барча муносабатларини тўлиқ узди ва шундан бери Аманда қайси футбол клубини янги инвестиция объекти сифатида танлаши ҳақидаги миш-мишлар тинмаяпти.

TEAMtalk нашри маълумотига кўра, ҳозир “Тоттенхэм” бошидан кечираётган инқироз Стейвли учун Льюис оиласидан Лондон клубини жозибали нархда сотиб олишга уриниш учун сабаб бўлиши мумкин.

“Ньюкасл”да ишлаган вақтида Стейвли Эдди Хау билан яхши муносабатлар ўрнатган ва агар келишув амалга ошса, Аманда бу мутахассисни “Тоттенхэм”га бош мураббий сифатида олиб келишга ҳам тайёр.