Баҳром Ҳайдаров: "Ҳар ўйиндан кейин айбни ўзимиздан қидирамиз"

“Қўқон-1912” – “Динамо” (2:3) ўртасидаги ўйиндан кейин мезбонлар бош мураббийи Баҳром Ҳайдаров матбуот анжуманида иштирок этди.

- Ўйинни яхши бошладик. Биринчи голдан кейин йигитлар бўшашиб кетишди. Тўпни назорат қила олмадик. Бўшашганни ҳисобига гол ўтказдик. Ўйин дебютини қандай бошлаган бўлсак, учрашувни шундай ўтказа олганимизда ўйлайманки, голларга олиб келмасдик. Иккинчи бўлимга келсак, рақиб 10 киши бўлиб қолди. Бундай вазиятларда ҳар бир футболчимиз ўзига кўпроқ олиши керак. Лекин бу нарса кўзга кўринмади. Ҳамма қўрқувда бўлди, тўпни йўқотишдан. Қанотлардан ҳам албатта узатмалар бўлиши керак. Аммо бирор ўйинчи масъулиятни ўзига олиб жарима майдони ичига индивидуал алдаб кирса маҳорат юзага чиқади. Шу нарсада қўрқув кўринди ва қарши ҳужумда иккинчи голни ўтказиб юбордик. Ўтган сафар руҳий ҳолат бўйича савол беришганди. Руҳий ҳолатдан ташқари маҳорат етишмаяпти. Биз ҳужум қиладиган вазиятларда ҳам оддий ҳолатларда тўпни йўқотиб қўйиб, дарвозамизга голли ҳужумлар бўляпти. Шунинг ҳисобига ҳам мағлубиятга учрадик, деб ўйлайман.

- Жамоа кетма-кет мағлубиятларга учрамоқда. Бунда мураббийлар штабининг ҳам айби борми?

- Албатта. Ўйиндаги эпизодларни гапирган бўлсам, умумий олтита учрашувни оладиган бўлсак, фақат футболчилар айбдор эмас. Биз мураббийлар штабининг ҳам айбимиз бор, айниқса, мени. Чунки кўп қарорларни бош мураббий сифатида мен чиқараман. Буни тан оламан. “Машъал” билан учрашувдан кейин раҳбарият билан гаплашгандик. Уларга катта раҳмат айтаман. Ишонч билдиришяпти ва ишлашда давом этяпмиз. Жамоа натижа учун курашяпти. Қийин бўляпти, аммо бир нарсани сакраб ўта олмаяпмиз. Бу вазиятдан чиқиб кетишга битта қадам бўлмаяпти. Ўйлайманки, “Қўқон-1912” барибир ушбу ҳолатдан чиқиб кетади. Ўтган йили про лигада ҳам шунақа вазиятлар бўлган. Биринчи давранинг охирги турида ҳам иложи борича максимал даражада уч очко учун курашамиз. Ўша ўйинни ўтказиб олсак, иккинчи давра учун таркибни кучайтиришга ва тайёргарлик кўришга вақт бўлади. Мураббийлар штабига келсак, ҳалол йўлдан кетиб ишлаб келяпмиз. Хатоларимиз бор, ўз устимизда ишлаймиз. Ҳар учрашувдан кейин айбни ўзимиздан қидирамиз. Футболчилар ҳам шуни ҳис қилишлари керакки, яна битта гап: 6 та мағлубият деяпсизлар-а, мураббийсиз ҳам ҳеч бўлмаса 6 та ўйиндан 1 тасида ютса бўлади. Футболчиларни ўзларига ҳам, интервью орқали ҳам айтяпман, мураббийсиз ҳам ўйинчилар ўзлари ҳеч йўғи 6 та ўйиндан 1 тасини ютишлари мумкин. Бу айбни уларга ағдариш эмас. Биз ўзимиздан айб қидиришимиз керак. Футболчилар ҳам кейнги ўйин учун ўзлари тўпланишса яхши бўларди.