Баҳром Ҳайдаров: "Режаларимиз учрашувда тўлиқ кўринмади"

“Қўқон-1912” – “Андижон” (1:1) учрашувидан кейин ташкил этилган матбуот анжуманининг иккинчи қисмида мезбонлар бош мураббийи Баҳром Ҳайдаров журналистларнинг саволларига жавоб қайтарди.

-  Авваламбор, бутун халқимизни Рамазон ойи билан табриклайман. Қолаверса, аёлларимизни ҳам байрами. Барчаларини муборакбод этаман. “Қўқон-1912” ва “Андижон” ишқибозларини футбол байрами бошлангани билан ҳам табриклайман. Ўйинга келсак, дебют ўйинимиз бўлди. Икки йилдан бери про лигада эдик ва учинчи йили Суперлигада иштирок этиш имкониятига эга бўлдик. Жамоада ҳаяжон бўлди. Бошидан йигитлар билан ҳаяжонда ўйнамасликка тайёргарлик кўрдик. Биринчи бўлимда гол ўтказиб юборганимиз фойдамизга ишлади, шекилли. Гол урдик ва йигитлардан босим тушди. Иккинчи бўлимда зўр бўлмаса-да, футболчиларни меҳнатлари орқали қониқиш ҳосил қилдим. Ўйин охиригача ташаббусни қўлга олиб, ғалабани илиб кетишимиз ҳам мумкин эди. Бироқ иккала таймни оладиган бўлсак, дуранг адолатли бўлди, деб ўйлайман.

- Натижадан қониқдим деяпсиз, ўйинданчи?

- Биринчи тур бўлганлиги сабабли ўйин сифатини яхшилашимиз керак. Қишки тайёргарлик пайтида яхши ўйинлар ўтказдик. Ҳар бир жамоада босим бўлади. Бу йил биз дебютантмиз. Албатта, умумий ўйиндан қониққаним йўқ.

- “Андижон”ни қанчалик ўргангандингиз ва рақиб қандай таассурот қолдирди?

- Имкониятимизга қараб “Андижон”нинг Туркияда ўтказган ўйинларидан 3-4 тасини кўрдик. Босим остида бошлаганимиз сабабли биз тайёрлаган режаларимиз бугунги учрашувда тўлиқ кўринмади. Буни таҳлил қиламиз, кўриб чиқамиз. Йигитларимиз ҳамма нарсани бажара оладилар. Фақат биринчи тур сабабли ўйлаганларимиз ўхшамади. Чиройли футбол бўлмади. 2-3 та турдан кейин футболчилар ўзларига келиб, ишончи ортгач, яхши ўйинларимиз бўлади.

- Учрашувда иккала жамоадан қайси футболчиларни алоҳида кўрсатган бўлардингиз?

- Биласизми, биринчи ўйин, ҳаяжон, ҳамма жон-жаҳди билан ўйнашга ҳаракат қилди. “Андижон”дан ҳам, ўз жамоамдан ҳам яққол кўзга ташланиб турган футболчи кўринмади. Ҳамма бирдек меҳнат қилди. Биринчи ўйинда барча жон-жаҳдини беради.

- Селекциядан кўнглингиз тўлдими?

- Албатта. Янги ўйинчилар ҳам ўйнади. Ўтган йили ишонч билдириб олиб қолган футболчилар ҳам тўп суришди. Про лигадаги таркибимиздан асосий қисмини олиб қолганмиз. Чунки улар ҳам ўсиши керак, Суперлигада торта оладилар. Уларга қўшимча қилиб, Суперлигани кўрган ўзимиз хоҳлаган 5-6 та футболчини олдик. Бундан ҳам кўп вариантлар бор эди. Лекин биз аввало аҳил жамоани ташкил этишни ўйладик. Маҳорат борасида қўл остимдаги йигитларни ривожлантириш ва янгиларини кашф қилиш. Мақсадимиз шундай. Ҳозирги таркибимиздан кўнглим тўқ.

- Кот-Д'Ивуардан келган ҳужумчи қайдномага киритилмади...

- Ҳа, кот-д'ивуарлик ҳужумчи келди. Уни трансфер ойнасининг сўнгги онларида таркибга қўшиб олдик. Уни ҳозирча машғулотда кўрдик. Аммо биринчи машғулотда озгина жароҳат олдик. Шу боис уни бу учрашувда қайдномага киритмасликка мажбур бўлдик. Тўғри, жароҳати енгил. Бироқ уни янада кучайтириб олишидан қўрқдик. Ҳали мавсум узоқ. Ишқибозларимиз ҳали уни кўрадилар ва ўйлайманки, жамоамизга катта фойда келтиради.