Баҳром Ҳайдаров: "Шундай ўйинлар орқали тажрибага эга бўламиз"

“Қўқон-1912” – “Насаф” (0:2) баҳсидан кейин уюштирилган матбуот анжуманида мезбонлар бош мураббийи Баҳром Ҳайдаров қатнашди.

- Кўпчилик кўрди ва ҳамма ҳам биладики, “Насаф” мамлакатимизнинг энг кучли клубларидан бири. Уларга қаршилик кўрсатиш жуда қийин. Шунга қарамасдан йигитларимизга раҳмат, бор кучларини беришди. Вазиятларимиз ҳам бўлди. “Насаф” ташаббусга эга бўлди. Шунда ҳам очко олиш учун жамоамизда имкониятлар юзага келди. Буни уддалай олмадик. Ҳаёт тўхтаб қолгани йўқ. Имкониятлар бор экан, ишлашда давом этамиз. Шундай рақибга қарши вазиятларга эга бўляпмизки, демак, футболчиларда ўсишга потенциал бор. Охирги учта турни олсак, дастлабки учта ўринни эгаллаб турган жамоаларга қарши ўйнаш ҳар қандай жамоага қийин. Шу учта турда кўпроқ очко олишни ўйлагандик. Лекин учта учрашувда уч очко олганимиз ҳам бизга ўзимизга бўлган ишончда ҳам далда бўлди. 6 очкони режалаштиргандик, афсуски, бунга эриша олмадик. Олдинда ўйинлар бор. Шундай учрашувлар орқали тажрибага эга бўламиз. Жамоани шундай даражага олиб чиқдикки, бир томондан сўкиш эшитсак ҳам, бир томондан хурсанд қиляпти. Футболчилар шунчалик ўйнашяпти, ишқибозлар, раҳбарият биздан кучли рақибларга қарши ҳам ғалаба кутаётгани хурсанд қилади. Бу бизга ишлаш учун мотивация. Жамоамизда руҳият кучли. Бемалол бу ҳолатдан чиқиб кетамиз. Иккита учрашувда ютқаздик. Бундан фожеа ясаш шарт эмас.

- Биринчи бўлим сўнггида Бешимов қулай вазиятдан гол ура олмади. Унга маҳорат етишмадими?

- Айтяпман-ку, 100 фоизлик вазият эди. Мен ҳам гол урди, деб ўйлагандим. Нафақат Бешимовни маҳорати, балки дарвозабонни ҳам маҳоратини эътироф этиш керак. У тажрибали посбон. Тепага ёки ён тарафга тепганда ҳам хафа бўлардик. Лекин чап оёғида очиқ томонига тепди. Бу вазиятда дарвозабоннинг маҳоратини ҳам инобатга олишимиз керак. Тўғри, бундай имкониятдан гол уриш керак. Бу Суперлига, ғалаба қозониш учун яримта вазиятдан ҳам фойдаланишимиз керак. Афсуски, фойдалана олмадик. Бешимовда имкониятлар бўлади. Кундан-кунга у ўйинига қўшяпти. Ўйлайманки, кейинги беллашувларда гол уради.  

- Ёзги трансфер ойнаси пайтида Кобеннага ўхшаган ўйинчиларни олиб қўймасак-да, деб қўрқяпман...

- Қўрқув бўлмаслиги керак. Янги жамоамиз. Суперлигага чиққанимиздан кейин таркибимизга янги футболчилар келган. Жипслашишяпти. Суперлигада кўп учрашувлар ўтказяпмиз. Аста-секин янги тузилган жамоа шакланяпти. Ҳа, бир-иккита позицияда камчиликлар бўляпти, буни устида ўйлаяпмиз. Ўйинчилар билан гаплашяпмиз. Катта ўзгариш қилмаймиз. Бир-иккита позицияларни кучайтиргани футболчиларимиз бор. Ҳозир номларини айта олмайман. Ўйлайманки, адашмаймиз, деган умиддаман. Албатта, ҳар бир мураббий жамоасини янада кучайишини хоҳлайди. Биринчи давра тугашига яқин раҳбариятга ҳам фикрларимни айтаман. Худо хоҳласа, яхши ўйинчилар оламиз. Аммо ҳозирги футболчиларимиз ҳам яхши. Иккита ўйиндан фожеа қилмаслик керак. Асосий эътиборимиз ўйинчи олишга эмас, ҳозирги футболчиларни янада ривожлантиришга қаратилган. Буни мухлислар ҳам билиши керак. Бешимовга, Хусановга Жўрабоевга ўхшаган йигитларни ривожлантириб, шулар орқали жамоани кучайтириш. Кейин булардан кучлироқ, устунроқ ўйинчилар топа олсак, кейингина олишимиз мумкин.