Баҳром Ҳайдаров: "У билан биринчи марта ишлашим эди, бу биз учун таваккалчилик бўлганди"

“Қўқон-1912” жамоаси бошқа клублари қаторида чемпионатимиздаги танаффус чоғида тайёргарлигини режа асосида давом эттирмоқда.

Ҳозирда бу клуб турнир жадвалида 18 очко билан 14-ўринни эгаллаб турибди. Бош мураббий Баҳром Ҳайдаров ва унинг жамоаси учун кейинги учрашувлар жуда муҳим саналади.

Sports.uz мухбири қўқонликлар устози билан суҳбатлашди.

- ФИФА кунлари муносабати билан чемпионатимизда давом этаётган танаффус чоғидаги тайёргарлик жараёнларидан қандай фойдаланяпсизлар?

- Ҳа, ФИФА кунлари муносабати билан чемпионатимизда танаффус бўляпти. Август ойидаги графигимиз қисқариб кетди. Бирданига 5 та ўйин ўтказишга мажбур бўлдик. Бу жисмоний тайёргарлигимизга анча салбий таъсир қилди. Футболчиларга 4 кун дам бердик. Бундан мақсад кетма-кет 5 та ўйиндан кейинги тикланиш жараёнлари яхши ўтишини истадик. Ҳозирча йигитларни чемпионат тонусига келтириб олишга ҳаракат қиляпмиз. Биринчи ҳафтада жисмоний тайёргарликка эътибор қилдик. Кейинги икки ҳафта мобайнида чемпионатга кўрилаётган олдинги тайёргарлик жараёнларимизни олиб борамиз. “Нефтчи”га қарши ёпиқ ўйинда иштирок этдик. Ҳозирги ҳолатимизни текшириб олдик.

- Яқинда жамоанинг асосий футболчиларидан бири Бахтиёр Қосимов легионерга айланди. Унинг кетиши қандай юз берди? Бу жамоа учун катта йўқотиш бўлдими?

- Бахтиёр Қосимов мавсум бошида тайёргарлигимиз охирига етиб қолган маҳалда таркибимизга қўшилганди. Ўшанда унинг жисмоний ҳолати бир аҳволда эди. Футболчининг тажрибаси ва бизга фойдаси тегишини инобатга олиб, формага тушиб олади, деб умид қилдик. Мураббий сифатида таваккал қилдик. У билан биринчи марта ишлашим эди. Айтяпман-ку, бу биз учун таваккалчилик бўлганди. Лекин меҳнаткаш бола экан. Ўз устида ишлаб, профессионаллигини кўрсатди. Ўйинлар давомида ўзига келди ва спорт формасини тиклаб жамоамизга катта фойдаси тегди. Раҳбарият томонидан Қосимов билан шундай келишилгандики, у ҳар қандай “условия”га кўниб шартнома имзолаган. Мабодо, четдан яхши таклиф бўлса, уни қўйиб юборишимиз бўйича келишиб олгандик. Бир куни олдинга келиб Ироқдан яхшигина молиявий тарафдан ва яхши жамоасидан таклиф бўлаётганини айтди. Мураббий сифатида уни кетишига рухсат бердим. Кейинги фаолиятида омад тилайман. Кўпроқ қолишини истардим, ўйлайманки, ҳали яна кўришамиз. У билан дўстона равишда хайрлашдик.

- Айни пайтда бош мураббий сифатида сизни қийнаётган муаммо нимада?

- Ҳар бир мураббийда қийинчилик бўлади. Албатта, бизда ҳам яхши ва ёмон тарафлама қийинчиликлар бор. Уларни бартараф этишга ҳаракат қиляпмиз. Биринчи давра охирларидаги мағлубиятлар кетма-кет бўлиб кетди ва бу жамоага таъсир қилди. Руҳий томондан тиклашга ҳаракат қиляпмиз. Ўзига ишончни қайтаряпмиз. Иккинчи давра бошида “Андижон”га 3:0, “Нефтчи”га 1:0 га ютқазганимизга қарамай, жамоа ёмон ўйнамади. Фақат ўзига бироз ишонч етишмаяпти. Олдинда яна 10 та ўйин бор. Охирги турда сафарда “Бухоро”га қарши баҳсда мағлубиятга учрамайлик деб эмас, фақат ғалаба қозониш учун майдонга тушдик. Ҳар бир учрашувда шундай жанговар руҳда майдонга тушиш учун йигитларни тайёрлаяпмиз. Ўйин бўйича бугунги кунга келиб ёмон эмас.  

- Жамоангизнинг турнир жадвалидаги ҳолатидан келиб чиқсак, бу сизни хавотирга солмаяптими?

- Хавотирга солмаяпти. Ишонч бор, биз бемалол олдимизга қўйилган вазифани бажарамиз. Йил бошида олдимизга лигада жон сақлаб қолиш вазифаси қўйилган. Лекин биз ўзимиз - мураббийлар ва футболчилар имкон борича юқорироқ ўринларда мавсумни якунлашни ният қилиб, шунга ҳаракат қиляпмиз.