Баҳром Ҳайдаров: "У операция қилинди ва мавсум охиригача сафдан чиқди"

Суперлиганинг 22-турида “Хоразм” “Қўқон-1912” билан беллашди ва учрашувда ҳисоб очилмади. Дуранг билан якунланган ўйиндан кейин меҳмонлар бош мураббийи Баҳром Ҳайдаров матбуот анжуманида иштирок этди.

- Олти очколик ўйин эди. Чунки жамоалар турнир жадвалида бир-бирига яқин жойлашишганди. “Хоразм” жамоаси тўпни жуда яхши назорат қилади. Йил бошидан бери буни кўриб келяпмиз. Бундай рақибга қарши ўйнаш жуда қийин бўлди. Рақиб кўпроқ тўп билан муомалада бўлгани учун бизни йигитлар кўпроқ тўпсиз бўлишади ва кўп куч йўқотишга тўғри келади. Лекин йигитларга раҳмат, охиригача чидаб ўйнашди. Дуранг бизни ҳам, уларни ҳам қониқтирмади, деб ўйлайман. Чунки уч очко иккала жамоага зарур эди. “Хоразм”да тўп назорати бўлди, имкониятларга эга бўлди, фойдалана олмади. Бизда қарши ҳужумларда айрим эпизодларда вазиятларга эга эдик. Иккита бир хил жамоа курашди ва 0:0 лик ўйин бўлди. Мураббий сифатида эътирозим йўқ. Иккала жамоа яхши ўйнади.

- “Қўқон-1912”да деярли голли имкониятлар бўлмади. Буни сабаби нимада?

- Тўғри айтяпсиз, ҳужум ҳам қилдик, аммо жарима майдони атрофида учинчи зонага ўтганда ўйинчиларимизга озгина совуққонлик етишмади. Тўпни йўқотиб қўйишдан қўрқишди. Биринчи бўлимда Датси ҳам, Ҳайдаров ҳам кўп тўп йўқотди. Иккинчи бўлимда захирадан тушганлар ҳам кўп тўп йўқотишди. Бемалол ўйнаганимизда эпизодлардан фойдаланишимиз мумкин эди. Бу учрашувда босим ва йигитларни ҳаёлида ютқазиб қўймаслик, деган нарса таъсир қилди, деб ўйлайман.

- “Хоразм” клубидан ўтган Шахзод Бешимов негадир кўринмаяпти...

- Бешимов машғулотимизда оғир жароҳат олган. Операция қилинди ва мавсум охиригача сафдан чиқди. Даволаниш жараёнини ўтяпти. Кейинги йилдан яна футболга қайтади. Шошилмасдан яхшилаб даволаниб олиши керак.