“Барса” 11 та ўйинда 9 та гол урган янги юлдузни олади

“Барселона” спорт бўлими мутасаддилари 37 ёшли Роберт Левандовскига ўринбосар қидириш билан банд. Польшалик ҳужумчининг амалдаги шартномаси жорий мавсум охирида тугайди ва катта эҳтимол билан клуб унга янги битим таклиф қилмайди.

Mundo Deportivo нашри каталониялик скаутларнинг назари Франция чемпионатида “Страсбург” сафида сермаҳсул ўйин кўрсатаётган Хоакин Паничеллига тушгани ҳақида маълумот тарқатди.

Манбага кўра, Франция чемпионатининг дастлабки ўнта учрашувида тўққизта гол урган 23 ёшли аргентиналик ҳужумчининг ўйини “Барселона” вакилларида жуда катта таассурот қолдирган.

Хоакин Паничелли Аргентинанинг “Расинг”, “Белграно”, “Аталая” ва “Ривер Плейт” академияларида футбол сир-асрорларини ўрганган. 2023 йили Европага кўчиб келиб, Испаниянинг “Алавес” ва “Мирандес” клубларида ўйнади.

“Страсбург” ўтган ёз истеъдодли футболчини 16,5 миллион евро эвазига ўз сафига қўшиб олди. Франция чемпионатига келиши билан тўпурарлик маҳоратини намойиш қилишга киришиб кетган ҳужумчи клуб билан 2030 йилнинг ёзигача шартнома тузган.