“Барса”: Бу ўйинчи хато қилди, энди арзонроқ олсак бўлади

Испания чемпионати пешқадами “Барселона” мутасаддилари Миланнинг “Интер” клуби марказий ҳимоячиси Алессандро Бастони бўйича музокара олиб бормоқда.

Каталония клубидагилар футболчини Италия миллий терма жамоасининг Босния ва Герцеговинага қарши жаҳон чемпионати йўлланмаси учун ҳал қилувчи ўйинда қизил карточка билан жазоланганини инобатга олган ҳолда, уни арзонроқ нархда сотиб олиш мумкин, деб умид қилишмоқда.

Бу ҳақда Mundo Deportivo хабар берди.

Италия терма жамоаси қаторасига уч марта жаҳон чемпионатига чиқа олмади. Айни пайтда Италия футбол жамоатчилиги мутасаддиларни кескин танқид қилмоқда.

Бастонининг “Барселона”га ўтиши бўйича келишув тақдири каталонияликларнинг молиявий имкониятлари ва трансфер бозоридаги устуворликларига боғлиқ бўлади. Мавжуд маълумотларга кўра, 26 ёшли футболчининг ўзи аллақачон трансферга розилик берган.