“Барса” энг содиқ футболчисини қадрламади. У кетишга мажбур

“Барселона” Дани Алвесга янги битим таклиф қилмади. 39 ёшли футболчи ўтган йили жамоага ёрдам бериш учун Бразилиядан қайтиб келган эди.

Фаолияти давомида энг кўп совринни қўлга киритган футболчи ижтимоий тармоқдаги саҳифасида Каталония клубини тарк этаётганини маълум қилди. Тажрибали ҳимоячи бунга сабаб қилиб, клуб раҳбарияти у билан янги шартнома тузишдан бош тортганини маълум қилди.

Дани Алвеснинг ўзи клуб унга келаси мавсум охиригача имкон беришини кутганини яширмади.

Бу ўйинчи 2008-2016 йиллар давомида “Барселона” шарафини ҳимоя қилган. Кейин “Ювентус”, ПСЖ ва ўз юртига қайтиб, “Сан Паулу”да ўйнади ва 2021 йилнинг ноябрида Каталонияга келиб, “Барса” билан қисқа муддатли шартнома тузганди.