"Барса" футболчиси Италияга отланди

«Барселона» таркибида тўп суриб келаётган ёш ҳужумкор яримҳимоячи Тони Фернандес яқин кунларида А Серияда иштирок этувчи «Венеция» клубига йўл олиши кутилмоқда. 

Бу ҳақда футбол бозоридаги ишончли манбалардан бири Фабрицио Романо хабар берди.

Манба маълумотларига кўра, икки клуб 18 ёшли футболчининг трансфери бўйича тўлиқ келишувга эришган. Унга кўра, «Барселона» ўз тарбияланувчисининг ўтиши эвазига тўрт миллион евро миқдорида тўлов қабул қилади. Шунингдек, каталонияликлар футболчининг келгусидаги эҳтимолий сотувидан 50 фоиз улушга эга бўлади.

Муҳими, келишувга «Барселона» томонидан талаб қилинган махсус банд ҳам киритилган. Унга мувофиқ, клуб келажакда маълум шартлар асосида Тони Фернандесни қайта сотиб олиш ҳуқуқини сақлаб қолади. Бу вариантни жамоанинг спорт директори Деку қатъий талаб қилгани айтилмоқда.

Эслатиб ўтамиз, Тони Фернандес «Барселона»нинг асосий жамоаси сафида ҳозиргача атиги икки ўйинда майдонга тушган ва ҳали гол ёки голли узатма билан ажралиб турмаган эди.