"Барса" "Ливерпуль"нинг яна бир юлдузини илиб кетмоқчи

"Ливерпуль" футболчиси Садио Мане "Барселона" қизиқишлари доирасига тушган. Бу ҳақда Испаниянинг ишончли "El Mundo Deportivo" нашри хабар берди. 

Каталониядаги манбалар ҳам клуб сенегаллик футболчига қизиқиш билдираётганини инкор этмади. Футболчининг ўзи ҳам "Барселона"га ўтишга қарши эмас. 

Мане "кўк-анорранглилар" сафида янада машҳурроқ бўлиши мумкинлигига ишонч билдирмоқда. У Ла Лига гранди билан ҳатто "Олтин Тўп" совринига эга чиқишни истамоқда.

Аввалроқ "Ливерпуль" юлдузига "Бавария" жамоаси қизиқиш билдираётгани ҳақида хабарлар чиққанди.  

Маълумот учун, Садионинг мерсисайдликлар билан амалдаги шартномаси 2023 йил ёзида якунига етади.