“Барса” суперфутболчини “қора рўйхат”га тиқди

Испаниянинг амалдаги чемпиони “Барселона” раҳбарияти “Атлетик Бильбао” етакчиси Нико Уильямсни кетма-кет иккинчи бор қўлга кирита олмаганини ҳазм қилиши жуда қийин кечмоқда.

RAC1 журналистларининг маълум қилишича, каталонияликлар 22 ёшли футболчини ўзининг “қора рўйхати”га киритиб қўйди ва энди “Барселона” ҳеч қачон бу ўйинчини трансфер қилишга уринмайдиган бўлди.

“Барселона” ўтган йили ёзда Европа чемпионатида Ламин Ямал билан тандем ҳосил қилиб, Испания терма жамоасининг қитъа чемпионига айланишига катта ҳисса қўшган Нико Уильямсни ўз сафига қўшиб олмоқчи бўлганди. Ўшанда Нико Бильбаода қолишни маъқул кўрганди.

Бу гал трансфер амалга ошиши деярли аниқ бўлиб улгурган эди. Каталонияликлар Уильямсни кутиб олишга тайёргарлик кўраётган паллада Нико “Атлетик” билан ўн йиллик шартномага имзо чеккани расман эълон қилинди.

Шу тариқа, “Барселона” қаторасига иккинчи йил ўзи кўзлаган трансфердан қуруқ қолди.