“Барса” янги юлдузни бир йил деганда юртига қайтариб юборди

2024 йилнинг январ ойида “Барселон” Бразилия чемпионати вакили “Атлетико Паранаэнсе” клубидан иқтидорли ҳужумчи Витор Рокени олиб келган эди.

20 ёшли футболчи Европага катта умидлар билан келган бўлса-да, каталонияликларнинг асосий таркибига кира олмади. Оқибатда, “Барселона” уни ёзда “Бетис”га ижарага берганди.

Бироқ каталонияликлар ўз ўйинчисини 27 февраль куни “Бетис”дан қайтариб олди ва бир кундан кейин Бразилияга трансфер қилди. Маълумотларга қараганда, “Палмейрас” Роке учун 25 миллион евро бадал пули ва беш миллион евро қўшимча бонус тўлашга рози бўлган.

- Клуб Рокега майдондаги ва ундан ташқаридаги ишларида энг яхши ниятларини билдиради, - деб боёнот берди “Барселона” клуби расмий сайти футболчи билан хайрлашиб.

Витор Роке “Барселона”га келганидан бери каталонияликлар сафида барча турнирларда 16 та учрашувда қатнашиб, ўз ҳисобига бир жуфт гол ёздириб қўйганди.  

Универсал ҳужумчининг “Палмейрас” билан шартномаси 2029 йилнинг 31 декабрига қадар имзоланди. Роке бунгача ўз юртида “Крузейро” жамоасида ҳам ўйнаган.