“Барса” зўрға олган юлдузидан дарров воз кечяпти

“Барселона” раҳбарияти катта ҳаракат ва харажатлар эвазига Бразилиядан Витор Рокени трансфер қилган эди.

19 ёшли футболчи ўтган мавсум ярмида Каталонияга келиб, жамоага қўшилди, лекин ўйинлари мухлису мутахассислар зўр таассурот қолдиргани йўқ.

Етарли ўйин амалиётига эга бўлмаган ёш юлдуз клубдан кетишга қарор қилди. Каталонияликлар уни бошқа клубларга ижарага бериб, маҳоратини оширганидан кейин клубга қайтариб олмоқчи бўлди. Бироқ Роке ижара вариантларидан бош тортди ва кетса, тўлиқ бошқа клубга ўтишини таъкидлаяпти.

Сўнгги маълумотларга қараганда, бразилиялик иқтидор эгасига иккита яхши вариант чиққан. Португалиянинг “Спортинг” ва Англиянинг “Эвертон” клублари трансфер маълумотларини тўплай бошлади.

Таниқли инсайдер Флориан Плеттенбергнинг маълум қилишича, “Эвертон” Роке учун 28 миллион евро таклиф қилишга ҳам улгурди.

“Барселона” 40 миллион еврога тушган футболчини арзонроқ – 30-35 миллион еврога қўйиб юборишга тайёрлиги айтилмоқда.