"Барселона" етакчиси номаълум муддатга сафдан чиқди. Унинг жароҳати жиддий

"Барселона" ярим ҳимоячиси Серхио Бускетс Ла Лиганинг 35-туридан ўрин олган "Атлетико"га (0:0) қарши ўйиндан сўнг, тиббий текширувдан ўтказилди.

Клуб матбуот хизматининг хабар беришича, шифокорлар 32 ёшли испаниялик футболчига юқори жағ синиши ташхисини қўйган. Ҳозирча, унинг қачон сафга қайтиши маълум эмас.

Бускетс кечаги беллашувда "Атлетико" футболчиси Стефан Савич билан бўлган ҳаводаги тўқнашувда жароҳат олган эди.

Серхио Бускетс жорий мавсум "Барселона" сафида жами 47 та ўйинда майдонга тушди ва жамоасининг 4 та голига ассистентлик қилди. Унинг каталонияликлар билан амалдаги шартномаси 2023 йилга қадар имзоланган.