“Барселона” Гвардиоланинг севимли шогирдини чақирди

“Манчестер Сити” билан амалдаги шартномаси жорий мавсум охирида якунланадиган жамоа сардори Бернарду Силва фаолиятини “Барселона” клубида давом эттириш имконига эга.

Бу ҳақда журналист Экрем Конур хабар берди.

Манбага кўра, каталонияликлар португалиялик футболчини эркин агент мақомида бепул тарзда таркибга қўшиб олишни жуда истамоқда. Чунки у ҳалигача “шаҳарликлар” билан тугаётган шартномасини узайтирмаган.

Хосеп Гвардиола журналистлар билан суҳбатларда бир неча бор жамоадаги энг ёқтирган шогирди айнан Бернарду Силва эканини таъкидлаб келади. Шунга қарамай, тажрибали ярим ҳимоячининг Манчестер клубидаги келажаги мавҳумлигича қолмоқда.

Каталония клуби мутасаддилари Бернарду Силва билан ҳамкорлик бўйича январь ойининг ўзидаёқ келиб олмоқчи.

31 ёшли плеймейкер “Манчестер Сити”да 2017 йилдан бери ўйнаб келади ва клублар миқёсидаги барча нуфузли совринларни қўлга киритиб бўлган. Шу боис, Силванинг ўзи ҳам муҳитни ўзгартиришга қарши эмас.

Бу мавсумда у барча мусобақаларни ҳисобга олган ҳолда 29 та ўйинда қатнашиб, 1 та гол урди ва 3 та голли узатма берди. Transfermarkt маълумотига кўра, Силванинг бозор қиймати 27 миллион еврони ташкил этади.