«Барселона» ҳимоячисини «Боруссия»га сотиши мумкин

Каталониянинг машҳур клуби «Барселона» таркибида тўп суриб келаётган фланг ҳимоячиси Эктор Форт яқин вақтлар ичида Германия Бундеслигасининг етакчи жамоаларидан бирига йўл олиши мумкин. Бу ҳақда немис нашри Bild хабар бермоқда.

Манба маълумотига кўра, Дортмунднинг «Боруссия» жамоаси 20 ёшли футболчини ўз сафига қўшиб олишга жуда яқин турибди. Ўтган дам олиш кунлари «шмеллар» вакиллари Барселонага ташриф буюриб, Фортнинг эҳтимолий трансфери юзасидан музокаралар ўтказган. Каталония клуби ёш латерал учун ўн миллион евродан ортиқ миқдорда маблағ ишлаб олишни режалаштирмоқда.

Эслатиб ўтамиз, 2025/2026 йилги мавсумда Эктор Форт «Эльче» клуби сафида ижара асосида ўйнаган. У 14 та учрашувда майдонга тушиб, икки бор рақиб дарвозасини ишғол этди ва яна икки марта ҳамжамоаларининг гол уришига ассистентлик қилди.